Ҡартлығы нурлы Фәриҙә инәйҙең

Алыҫ Нижневартовск ҡалаһында йәшәүсе ҡыҙы Фирүзә, Яңы йыл бүләге итеп әсәһенә бер йылға “Торатау” гәзите яҙҙыртырға теләүен белдереп, редакцияға шылтыратҡас, уның был изге ниәтен һөйөнөп ҡабул иттек. Оҙаҡ та үтмәй йыраҡта йәшәүсе балаһының йылы сәләме менән бүләген эйәһенә алып барып та тапшырҙыҡ. Бына ошо рәүешле беҙ Фәриҙә Мөхәмәт ҡыҙының ишеген ҡаҡтыҡ, оло йөрәкле ҡатын менән таныштыҡ.

Сығышы менән Бөрйән яҡтарынан булып сыҡты инәй. Йәшләй генә Ишмөхәмәт исемле егеткә тормошҡа сыға. Береһенең атаһы - коммунист, икенсеһенеке - мулла, ләкин был икәүҙе дуҫлыҡ бәйләй, шуға балаларын да ҡауыштырырға ҡарар итәләр. Шулай итеп, йәштәр атайҙарының тәҡдиме, фатихаһы менән өйләнешә. Бер-бер артлы алты балалары тыуа. Ләкин йәшнәп донъя көткән саҡтарында ғаилә башлығы, ҡаты сиргә юлығып, вафат була. 33 йәшендә 6 бала менән тол ҡала Фәриҙә. Иң кесе ҡыҙҙары Фирүзә атаһынан 1 ай ҙа 3 көнлөк кенә булып ҡала.

Ҡайғы, ауырлыҡтар кешеләрҙе яҡынайта, берләштерә, сыныҡтыра. Ялтырандағы ике туған апаһы вафат булғас, уның ете балаһына әсә булыу яуаплылығы ла Фәриҙә Мөхәмәт ҡыҙын өркөтмәй. Еҙнәһе һоратып килгәс, алты бала янына тағы ла етәү һыйыр, ти ҙә ризалаша. Шулай итеп, 13 балаға атай-әсәй булып, уртаҡ донъя көтөп алып китәләр. Әйтеүе генә еңел, ул заманда барыһы ла ҡул көсө менән башҡарыла, Фәриҙә Мөхәмәт ҡыҙына ла эштең арыуы төшә. Ҙур ғаиләгә көн һайын икмәк һалыу, усаҡ яғып ашарға бешереү, кәритә-кәритә кер йыуыу кеүек мәшәҡәттәр әллә күпме көстө-ваҡытты алһа ла, һис ҡасан зарланмай сабыр ҡатын, балаларҙы тиң күреп, һәр береһенә йөрәк йылыһын тигеҙ өләшергә тырыша. Ире бригадир булғас, бригада кешеләренә ашарға бешерергә лә һис ҡыйынһынмай уңған хужабикә.

Һуңғараҡ ишле ғаилә Көҙәндә төпләнә. Балаларҙы берәм-берәм аяҡҡа баҫтырып, инде бер аҙ еңел тын алып та өлгөрмәйҙәр, Ишмырҙаһын юғалта. Уның менән 16 йыл ғына йәшәп өлгөрә Фәриҙә, ләкин һағынып иҫкә алырлыҡ бәхетле йылдар була улар. Хәҙер инде ул көндәргә лә 30 йыл ваҡыт үтеп киткән. Һынауҙарҙың иң ауырын - бала ҡайғыларын да кисерергә тура килә әсәгә. Ләкин ул һынып-бөгөлөп төшмәй, яҙмышына күнеп, барыһын да сабыр ғына күтәрә. Тормошто яратыуы, һәр көнгә шатлана белеүе, яҡындарына һөйөүе йәшәтә лә инде уны.

Аллаға шөкөр, ҡартлығы нурлы Фәриҙә Мөхәмәт ҡыҙының. Бөгөн ул ҙур яҡты йортта йәшәй. Балалары әсәләренә ауыл ерендә рәхәт йәшәү өсөн бөтә шарттар тыуҙырған. Өйҙөң эсе йылы, бөхтә, хужабикәһенең ҡояштай балҡыған йөҙө уға тағы ла йәм, ҡот өҫтәгәндәй. Эйе, хаҡ әйтә шул ул халыҡ: йәшлегең тәүфиҡлы булһа, ҡартлығың бәхетле булыр, тип. Заманында балаларының береһен дә айырмай, улар өсөн йән атып йәшәгән оло йөрәкле әсә бөгөн ғәзиздәренең ҡәҙер-хөрмәтенә, иғтибарына, йылы һүҙҙәренә күмелеп ғүмер итә. Балалары ла ғорурланырлыҡ, һәр ҡайһыһы һөнәрле, матур эш урындары биләй. Был донъяла йәшәүебеҙҙең мәғәнәһе, тормошобоҙҙоң йәме лә шунда түгелме һуң?!