“Хоҡуғым бар. Башҡортостанда эшләнгән!”

Был ғорур яңғыраған һүҙҙәрҙе хәҙер “Маҡар урман хужалығы” дәүләт автономиялы учреждениеһы коллективы ла түш киреп әйтергә хаҡлы. “Көньяҡ Уралдан боланут сәйе” етештереүҙе яйға һалған предприятие “Башҡортостан аҙығы” билдәһенә лайыҡ булды.

Тап ошо исем аҫтында республиканың Ауыл хужалығы министрлығы һәм “Башҡортостан” теле-радио компанияһы ойошторған мультимедиа проекты еңеүселәре араһында улар ҙа тәбрикләнде.

Йыл башында иғлан ителгән конкурс һөҙөмтәләрен барлауҙа БР Хөкүмәте Премьер-министры урынбаҫары, ауыл хужалығы министры Илшат Фәзрахманов, муниципаль берәмектәрҙә ауыл хужалығы тармағын яҡтыртыусы журналистар ҡатнашты. Тантанаға Рәсәйҙең билдәле актеры, барыбыҙ ҙа “Улицы разбитых фонарей” фильмындағы Дукалис тип белгән Сергей Селиндың килеүе лә ҙур ҡыҙыҡһыныу менән ҡабул ителде.

Питерҙа башҡорт балы һатылған бәләкәй магазиндар байтаҡ, халыҡ уның тәмен, файҙаһын белә. Ҡаҙы, ҡымыҙығыҙҙы ла таныта алаһығыҙ, Башҡортостанда ошо йүнәлештә эштәр алып барылыуы бик яҡшы. Бөгөн үҙем өсөн тағы бик күп тәбиғи, файҙалы аҙыҡ-түлек етештереүселәрҙе астым, - тине актер проект еңеүселәрен тәбрикләп. Журналистарҙы иһә ауыл ерендә йәшәүселәргә, хеҙмәт кешеһенә тағы ла иғтибарлы булырға, күберәк яҙырға саҡырҙы.

- Гала-концерт мәлендә ҙур сәхнәгә сығарып, сәйебеҙҙе маҡтап тәбрикләнеләр. Проект республика етештереүселәренә юл асыуға, экологик яҡтан таҙа, тиңе булмаған ризыҡтарыбыҙҙы башҡа төбәктәргә лә танытыуға, ғөмүмән, ауыл хужалығы тармағында тырышыусыларға иғтибар арттырыуға маҡсатланған, - тип уртаҡлашты Маҡар урман хужалығы директоры Сәлим Хафизов. – Салауат, Стәрлетамаҡ тирәһенән конкуренттар булманы. Башҡорт балы янында үҙебеҙҙең шифалы сәй ҙә булһын, тип тырышабыҙ.

Әйткәндәй, “Башҡортостан аҙығы” билдәһенә лайыҡ булған предприятие тейешле лицензиялар алып, Ырымбур дарыуханалары менән дә хеҙмәттәшлек көйләгән. Мәскәү, Ҡазан тарафтарында Ишембайҙа етештерелгән сәйгә юлыҡһағыҙ ҙа аптырамағыҙ, ғорурланып, “Үҙебеҙҙекеләр!” тип кенә ҡуйырға хаҡыбыҙ бар!