“Еҙнәмә барып, хур булманым...”

Ғүмерҙәре буйы малсылыҡта, заманында миллионер колхоз булған “Трудовик”та ал-ял белмәй тырышҡан күркәм парҙың тормош юлы, кемдер әйткәнсә, ябайлығы менән бөйөк. Ике хеҙмәт ветеранының күп һанлы маҡтау ҡағыҙҙары - йәш, көслө саҡтың бер иҫтәлеге. Гөлмирә Рәшит ҡыҙы заманында өс мең литр һөт һауып алған алдынғы һауынсыларҙың береһе ул.

Күренеп тора, балаларының ҡәҙер-хөрмәтен күреп йәшәй ҡарттар.

- Ике улыбыҙ ауылда төпләнде, килендәрҙән уңдыҡ, ейән-ейәнсәрҙәр тәртипле, ярҙамсыл, - тип иң оло шатлыҡтары менән уртаҡлашты Гөлмирә инәй. Бабайының күҙ ҡарашы менән уны йөпләп, риза булып ултырыуында был матур ғаиләнең бәхет серенә төшөнә бирҙем – берен-бере аңлап, күңел китешмәй илле икенсе йыл татыу ғүмер итәләр. Бер ҡыҙ, өс улдары күптән башлы- күҙле булып, үҙ донъяларын ҡорған, ә ете ейән-ейәнсәре биш бүлә бүләк итеп өлгөргән!

- “Загслашыуҙы” ғына һуҙғанбыҙ, оло улыбыҙ тыуғас ҡына яҙылыштыҡ. Шатлыҡ-бәхет түгел, ғаиләбеҙгә төшкән уртаҡ ҡайғы ҡауыштырҙы шул беҙҙе, - тип хәтерләне Гөлмирә инәй Йәнырыҫҡа килен булып төшкән саҡтарын иҫләп. – Әмир – бер туған апайымдың ире – еҙнәм ине. 21 йәшендә йәшен һуғып, апайым вафат булды. “Сабыйын йәтим итмәйһең”, - тип кенә әйтте әсәй. Уның һүҙенән сығыу юҡ, шулай 18 йәшемдә 28 йәшлек еҙнәмә димләнеләр, бер йәш тә өс айлыҡ ҡыҙҙарына әсәй урынына ҡалдым. Сабыр, егәрле булды бабайым. Бер ваҡыт эске тотоп ҡайтманы... Ҡәйнәм Фәрхибаныу Ғәләүетдин ҡыҙына рәхмәттәр уҡыйым, колхозда ал-ял белмәй эшләнек, балалар ҡараулы, тәрбиәле булды. Элек бит декрет ялы, отпуск тигән нәмә юҡ ине. Ҡәйнәм менән 26 йыл бер йортта донъя көткәнбеҙ. Ике улыбыҙ өйләнгәс тә ике килен менән байтаҡ ҡына бергә йәшәнек, бер-бер артлы өс сабыйҙары тыуҙы – өй геү килеп торор ине. Ҡайҙа инде хәҙер йәштәрҙә бындай түҙемлек, ҡайһы бер ғибрәтле хәлдәрҙе ишетеп, ауырлыҡҡа түгел, рәхәткә сыҙай алмайҙар, тип ҡуяһың.

Бөгөн тап Әмир бабай менән Гөлмирә инәй кеүектәр тыуған ер ҡотон һаҡлай, йәштәргә ғаилә ҡиммәтен аңларға ярҙам итә. “ Ғүмерҙәре, һаулыҡтары булһын, беҙҙә таяныс тойоп йәшәһендәр. Атай, әсәй, тип бер йортҡа йыйыла алыуыбыҙ – иң ҙур бәхет!” – ҡәҙерлеләренә хәбәрсе килеүен белгәс тә, балалары, кейәү-килендәре телефон аша ошо уртаҡ изге теләктәрен еткерә һалды. Ғәзиздәрегеҙ әйткәне килһен, Хоҙай Тәғәлә икегеҙгә лә оҙон ғүмер насип итһен!