Рәхмәте лә булды, тәнҡите лә әйтелде

Ишембай районы хакимиәте башлығы Марат Ғайсин Уразбай халҡы менән осрашты. Был ауылда йәшәүселәрҙең һорауҙарын тыңланы, тормош-көнкүрештәре менән ҡыҙыҡһынды.

Ауылдың аҡһаҡалы Рәшит ағай Фәхретдинов иң элек Уразбайҙа һуңғы осорҙағы матур үҙгәрештәргә рәхмәт әйтте. Юлдарҙың матурланыуын, балалар баҡсаһы эшләп килеүен, ауылға маршрут автобустарының көйлө йөрөүен билдәләне. Ләкин шул уҡ ваҡытта үҙен генә түгел, ауылдаштырының да күңелен өйкәп торған мәсьәләне – газ ҡасан инер тигән һорауын да күтәрҙе.

- Мәктәпкә газ килгәнгә хәҙер 20 йыл тулып килә. Халыҡ һаман газһыҙ. Ауылда пенсионерҙар күп. Утын менән йылытыуы ололарға еңел түгел, - тине ул.

Розалия Сөләймәнова Йәштәр урамында электр утының насар яҡтыртыуына зарланды. Күп йорттарҙың электр менән йылытылыуы арҡаһында көсөргәнеш барлыҡҡа килеүе, шул сәбәпле өйөндәге уттың көсө кәмеүе, һөҙөмтәлә һыу ҙа ала алмауы, компьютер менән эшләгәндә лә уңайһыҙлыҡтар килеп сығыуы хаҡында һөйләне. Комсомол урамында электр көсөргәнешенең “һикереүе” лә халыҡҡа мәшәҡәттәр өҫтәй икән, һөҙөмтәлә көнкүреш техникаһы йыш ҡына сафтан сыға. Шулай уҡ трансформаторҙың Һәләүек йылғаһына яҡыная барыуына ла борсолоу һүҙҙәре яңғыраны. Был һорауҙарҙы хакимиәт башлығы иғтибар үҙәгенә алды, сара күреләсәге хаҡында белдерҙе.

Фатима Дәүләтҡолованың Бөйөк Ватан һуғышы яугирҙарына ҡуйылған һәйкәлде яңыртырға кәрәк тигән тәҡдиме лә хуплау тапты. Киләсәктә уразбайҙарҙың был ниәте лә тормошҡа ашыр, моғайын. Бесәнлектәрҙе файҙаланған өсөн түләүгә ҡағылышлы һорауҙар ҙа яңғыраны, төп дөйөм белем биреү мәктәбен ҡабаттан тергеҙеү тураһында ла мәсьәлә күтәрелде. Урта мәктәпте асыу ауылда балалар һанына бәйле булыуы ентекле аңлатылды.

Йыйылыш аҙағында ҡаты-көнкүреш ҡалдыҡтарын сығарыу тәртибе тураһында ла һүҙ барҙы, ауылды бергәләп таҙалыҡта, тәртиптә тоторға кәрәк тигән саҡырыу ҙа урынлы булды.