ҺӘР КЕМГӘ ЯҘҺЫН ОШО БӘХЕТ

Этҡол ауылында тыуып үҫкән Ильяс Яҡуп улы Фәхретдиновтың бала сағы колхозлашыу мәле, аслыҡ-яланғаслыҡ осорона тура килә. Һуғыш йылдары ауырлығы ла үҫмерҙең яҙмышын үҙе теләгәнсә бора.

Ерҙе, кешеләрҙе, хеҙмәтеңде һөйөүҙән яралған бәхет.

Этҡол ауылында тыуып үҫкән Ильяс Яҡуп улы Фәхретдиновтың бала сағы колхозлашыу мәле, аслыҡ-яланғаслыҡ осорона тура килә. Һуғыш йылдары ауырлығы ла үҫмерҙең яҙмышын үҙе теләгәнсә бора.

Яҡындарын иҫләгәндә ҡараштарын һағыш баҫа - ни хәл итәһең, заманаһы ҡатмарлы булған, ололар мәңге эш менән, балалар ҙа тиҙ арала ҡул аҫтына ингән.

- Атайым Һайран ауылында ятып эшләне. Ниндәйҙер йомош килеп сыҡһа, әсәйем мине Һайранға ебәрә ине. Мин, күрше бала-сағаны эйәртеп, сығып китәм. Хәҙерге кеүек юлдар ҙа, аяҡ кейеме лә юҡ, табандар ярылып бөтә. Әле булһа аптырайым, нисек 8-10 йәшлек балаларҙы ҡурҡмай сығарып ебәргәндәрҙер, - тип хәтерләй ошо көндәрҙә туғыҙынсы тиҫтәһен тултырған тыл һәм хеҙмәт ветераны.

Һуғыш осоро балаларының яҙмышы уртаҡ. Этҡол урта мәктәбенең алтынсы класын тамамлағандан һуң артабан уҡырға мөмкинселеге булмай. Аталары фронтта булғанлыҡтан, бөтә эш әсәй һәм балалар иңенә төшә. Бесәнен дә саба, кәбәнен дә ҡоя, утынын да ташып өлгөрә.

1949 йылдың февраль айын бөгөнгөләй хәтерләй Ильяс ағай. Атаһы менән атҡа ултырып, хәрби хеҙмәткә оҙатылыр өсөн Петровскиға юлланалар. Әптекте сыҡҡас, ат атламай ҙа ҡуя - йән өшөткөс һыуыҡ, эргәлә генә олоған бүре тауыштары. Йәйәү атларға тура килә. Өфөнән тауар поезында Приморск крайына, артабан Владивостокҡа килеп төшә. Оҙон юл, ашарға юҡ, ҡайҙа поезд, ҡайҙа корабль менән Ҡытай Республикаһына хәрби часҡа барып етә. Илгә тоғро хеҙмәт итеп, дүрт йыл тигәндә тыуған ауылына ҡайта.

Мөхәббәтле ғүмер кисерә Ильяс Яҡуп улы. Уразбай ауылы һылыуы Мәҙинә Фәхретдин ҡыҙы менән 1955 йылда донъя ҡороп, алтын туйҙарын да ҡаршыларға насип була. Тигеҙ ҡартлыҡ һирәктәргә генә яҙған бәхет шул, ҡатынының мәрхүмә булыуына ла ун йылдан ашыу. Егәрле, татыу пар алты балаға ғүмер биргән. Бер түгел дүрт улүҫтергәндәр, һәр береһенә йорттар һалышҡандар. Улдары Рәсүл, Рафаил, Рәфил, Ришат, ҡыҙҙары Нәсимә, ғаилә ҡороп, тыуған ауылында төпләнгән, икенсе ҡыҙҙары Рәсимә Салауат ҡалаһында йәшәй.

Хаҡлы ялға сыҡҡансы тракторынан төшмәй Ильяс ағай. «Ҡыҙыл Урал» колхозы баҫыу-ҡырҙары әле лә уның кеүек намыҫлы, тырыш быуындың әсе тирен хәтерләйҙер. Олоғайғас, кочегар булып та эшен дауам итә. Ярты быуатлыҡ хеҙмәт стажы менән ғорурланырға хаҡлы ағай. Тыл һәм хеҙмәт ветераны бик күп маҡтау ҡағыҙҙары, «Халыҡ хужалығындағы ҡаҙаныштары өсөн» бронза миҙалы, «Почёт билдәһе» ордены менән бүләкләнгән. Заманында Мәскәүҙә Бөтә Союз ауыл хужалығы ҡаҙаныштары күргәҙмәһендә лә ҡатнаша. Бөгөн ул кинйә улы Ришат һәм килене Әлиә менән бергә донъя көтә. Оло йәштә булһа ла тик тороуҙы белмәй - ейән-ейәнсәрҙәрен ҡараша, көрәк тотоп баҡсаһында ла булыша.

- Кешелеклеге, ярҙамсыллығы, сабыр холҡо барыбыҙға өлгө. Аталы бала – арҡалы, тип юҡҡа ғына әйтмәгәндәр. Беҙ тыуған йортҡа йыйылып, атайыбыҙ ҡуйынына һыйынабыҙ, нурлы йөҙөн күреп, йылы

һүҙҙәрен ишетеп йәшәүгә көс, дәрт алабыҙ, - ти хәҙер инде үҙҙәре олатай-өләсәй булып өлгөргән балалары.

Һәр кемгә яҙһын ошо бәхет. Ерҙе, кешеләрҙе, хеҙмәтеңде һөйөүҙән яралған бәхет.

Фото: ғаилә архивынан.

Читайте нас:

Регистрационный номер ПИ ТУ02-01361. Свидетельство выдано Управлением Федеральной службы по надзору в сфере связи, информационных технологий и массовых коммуникаций по Республике Башкортостан от 24.07.2015 г.

Новости, статьи, другие публикации, а также фото-, видео-, графические материалы являются объектами авторского и исключительного права газеты «Торатау». Перепечатка допускается только по согласованию с редакцией. Ссылка на авторство газеты «Торатау» обязательна. Для интернет-изданий прямая активная гиперссылка на сайт газеты «Таратау» обязательна.

Телефон

8(34794) 2-68-45

Электрон почта

[email protected]

Адресы

453200, город Ишимбай, ул. Советская, 88

Реклама хеҙмәте

8(34794) 4-11-22, 8-917-45-44-640

Редакция

8(34794) 2-68-45

Ҡабул итеү бүлмәһе

8(34794) 3-22-75

Хеҙмәттәшлек

8(34794) 3-22-75