Ололар һүҙе - аҡылдың үҙе

Этҡол моделле ауыл китапханаһында "Ололар һүҙе - аҡылдың үҙе" тип аталған сара уҙҙы. Был тәрбиәүи әңгәмәлә ауылдың ағинәйҙәре үҫмер ҡыҙҙарға өгөт-нәсихәттәр аша ата-әсә менән бала, туғандар, дуҫ-иштәр араһындағы мөнәсәбәттәр тураһында һөйләне. Бигерәк тә, һүҙ йоғонтоһо тураһында айырым туҡталып кителде.

"Һөйҙөргән дә тел, көйҙәргән дә тел", "Кеше һүҙе - кеше үлтерә", "Яҡшы һүҙ - йән аҙығы" мәҡәлдәренә таянып, насар, һүгенеү һүҙҙәренең кеше һаулығына, булмышына йоғонто яһауы тураһында ағинәйҙәр - Әлфирә, Тәнзилә апайҙар тәрән мәғәнәле фекерҙәрен һөйләнеләр. Оҙаҡ йылдар Этҡол врач амбулаторияһында фельдшер булып хеҙмәт иткән Инира апай үҫмер ҡыҙҙарҙың шәхси гигиенаһына туҡталды. Был әңгәмә буй еткерәсәк ҡыҙҙарға - буласаҡ әсәләргә бик мөһим, тәрбиәүи маҡсатҡа эйә булды.