ПОГОНЛЫ ДҮРТӘҮ Ҡайҙа тиһегеҙме? Регина менән Фәнзил Нафиҡовтар ғаиләһендә!

10 ноябрь – Рәсәй Федерацияһының Эске эштәр органдары хеҙмәткәре көнө

Фәнзил Исмәғил улы Ишембай Эске эштәр бүлегенең дежур часында смена начальнигы булһа, сержант Регина Риф ҡыҙы - биналарҙы һаҡлау посы полицейскийы, ә улдары Сәғит менән Алмаз - ҡалабыҙҙағы данлы уҡыу йорто кадеттары.

Дүрт бала үҫә үҙенсәлекле ғаиләлә. Башҡорт кадет корпусында бер-бер артлы ғына дәртләнеп уҡый башлаған Сәғит менән Алмаз беренсегә барған Айгиз ҡустыларына һәм 10 айлыҡ һеңлеләре Суфияға ҙур терәк – абызый!

- Элек Мичурин урамында йәшәнек, кадеттарҙың маршына, төрлө күнекмәләр эшләүенә күҙҙәре ҡыҙа торғайны. Икеһе лә тап ошонда уҡырға теләне. Тырышып белем алалар, һөйөнөп торабыҙ, - ти әле декрет ялында бәләкәстәрен һөйөп-наҙлап ҡына үҫтергән йәш әсә. – Полицияла хеҙмәтемде дауам итәсәкмен. Бына иртәгә һөнәри байрамыбыҙ уңайынан Мәҙәниәт һарайында үтәсәк тантанаға икәүләп барабыҙ. Шатлығыбыҙ менән дә уртаҡлашайым: Фәнзил капитан погондарын аласаҡ.

Ире, улдары өсөн ғорурлығы Регинаның һөйкөмлө йөҙөнә яҙылған – шулай булмай ни!

- Икебеҙ ҙә Архангель районынан булһаҡ та, Ишембай күптән тыуған ҡалаға әйләнде. Ғаилә ҡороуыбыҙға быйыл - 15 йыл. Үҙем - ғаиләлә унынсы бала, шуғалырмы, өйләнешкәндә үк миндә лә, кәләштә лә бер-ике бала менән сикләнеү уйы булманы, - ти ҡыҙына атайҙарса хәстәрлек менән баҡҡан Фәнзил. – Үҫкәс, бер-береһенә таяныс булырҙар.

Әле дәртләнеп Кузьминовкала йорт һала Нафиҡовтар. Күп балалы ғаилә булараҡ, дәүләт бүлгән ер участкаһын ҙур ярҙам тип ҡабул итә улар. Әсәлек капиталы ла ипотекаға алынған фатир түләүен ҡаплаша. Райондаш, рухташ, хатта һөнәрҙәшһегеҙ, тим Нафиҡовтарға.

- Шулай булыуы һәйбәттер ҙә, татыу ғаиләлә балалар бәхетле булып үҫә, беҙҙең төп теләк ошо, - ти улар бер тауыштан. Погондарҙағы йондоҙҙар эрерәк була барыуына ғәжәпләнергә түгел, эргәңдә һәр береһе ҡояшҡа тиң ғәзиздәрең – бына ул байлыҡ, ғорурлыҡ!