УНЫҢ «ҠАТЫНДАР»ЫН БӨТӘҺЕ ЛӘ ЯРАТА

Талантлы шағирә, прозаик, билдәле журналист Гөлнур Яҡупованың Ишембайҙа ижад кисәһе үтте.

Ҡаланың башҡорт китапханаһына был көндө Әхмәтзәки Вәлиди исемендәге 2-се башҡорт гимназия-интернаты уҡыусылары, шағирәнең туғандары, ижадташ дуҫтары, уның әҫәрҙәрен яратып уҡыусылар йыйылды һәм был осрашыу күркәм бер ижад байрамына әүерелде. Башҡортостандың атҡаҙанған мәҙәниәт хеҙмәткәре, Салауат Юлаев ордены кавалеры, ике тиҫтә китап авторы Гөлнур Яҡупова сығышы менән күрше Ғафури районы Сәйетбаба ауылынан. Шуға ишембайҙар уны яҡташтары һымаҡ бик йылы ҡабул итте.

Әлбиттә, Гөлнур Миҙхәт ҡыҙы хаҡында һүҙ уның тыуған яҡтарынан башланды. Шағирәнең Ишембайҙа йәшәүсе апаһы Миниямал Фәсхетдинова һөйләгәндәре аша ла ул яҡтың гүзәл тәбиғәте күҙ алдына килде. “Гөлнур туғанымдың китаптарында ла тәбиғәтебеҙ гүзәллеге хаҡында күңелгә ятышлы итеп яҙылған. Шундай матур китаптары өсөн рәхмәт уға. Ғөмүмән, туғандарын ҡәҙерләп-хөрмәтләп тороуы менән дә беҙгә ул бик яҡын”, - тип шағирә хаҡында әллә күпме йылы һүҙҙәр әйтте.

Гөлнур Яҡупова педагогия училищеһында уҡыған йылдарында ҡәләм тирбәтә башлай. Ижад емештәре тәүҙә уҡыу йортоноң стена гәзитендә баҫыла, ә 1964-65 йылдарҙа республика баҫмаларында ла күренә. Башҡорт Дәүләт университетын тамамлағандан һуң йәш белгес үҙенең хеҙмәт юлын Ғафури районының “Звезда” гәзитендә башлай. Ошонда ул тәржемә эше буйынса ҙур тәжрибә туплай. Был иһә уға артабан үҙенең әҫәрҙәрен руссаға тәржемә итеү йәһәтенән дә ныҡлы ярҙам итә. “Тулы ижад тормошо менән 40 йәшем тулыр алдынан Өфөгә күсеп килгәс йәшәй башланым”, - тип һөйләне хәҙер инде поэзияла ла, прозала ла йөҙөп йөрөп ижад итеүсе Гөлнур Миҙхәт ҡыҙы.

Гөлнур Яҡупова әҫәрҙәренең өс телдә яңғырауы кисәне байытты. Автор шулай балаларға төрлө йомаҡтар әйтеп, сараны йәнләндерҙе.

- Бөгөнгө осрашыу бик оҡшаны. Ноғман Мусин кеүек бөйөк яҙыусыларҙың тыуған төйәгендә сығыш яһауым минең өсөн шатлыҡ та, мәртәбә лә. Әлеге сара өлкәндәрҙең дә, йәштәрҙең дә ҡатнашыуы менән дә күңелгә

ятты. Ошондай матур ижад байрамын ойошторғандары өсөн ишембайҙарға рәхмәт. Әле бына башҡорт гимназия-интернатына ла саҡырҙылар, - тип тағы ла Ишембай еренә килергә ниәтләүе хаҡында ла әйтте

Ижад кисәһе тамамланһа ла, осрашыуға килеүселәр тиҙ генә таралышырға ашыҡманы. Шағирәнең эргәһенә килеп аралашыуҙар, һорауҙар биреү дауам итте. Уның автографы яҙылған китаптарын да сират тороп алдылар. Ижад һөйөүселәр өсөн ошондай йәмле осрашыу уҙғарғандары өсөн китапхана мөдире Земфира Кошелева һәм сараны шул тиклем бай, йәнле итеп алып барыусы Әнисә Сөйәрғоловаға, әлбиттә, ҙур рәхмәт.