УҠЫТЫУСЫБЫҘҒА – 100 ЙӘШ!

«100-гә тиклем йәшә!» - тип теләйбеҙ беҙ ғәҙәттә туғандарыбыҙҙың, яҡындарыбыҙҙың тыуған көнөндә. 34 йыл ғүмерен балалар уҡытыуға арнаған педагогия хеҙмәте ветераны Мария Зыя ҡыҙы МОСТАЕВА үҙенең 100 йәшлек юбилейын иҫәнлектә-һаулыҡта ҡаршылармын, тип уйланымы икән!

Мария Зыя ҡыҙы 1918 йылдың 20 октябрендә Стәрлетамаҡ ҡалаһында күп балалы уҡытыусылар ғаиләһендә тыуа. 1934-1939 йылдарҙа Стәрлетамаҡ пединститутында уҡый һәм Учалы районына эшкә ебәрелә. 1941 йылда һуғыш башланғас, тыуған ҡалаһына ҡайта, 1941-48 йылдарҙа 1-се урта мәктәптә, 1948-52 йылдарҙа Өфөнөң 1-се мәктәп-интернатында (хәҙерге Рәми Ғарипов исемендәге гимназияла) уҡыта.

1952 йылда Ишембайға күсеп килә һәм 1973 йылда хаҡлы ялға киткәнсе 2-се мәктәп-интернатта (хәҙер Ә. Вәлиди исемендәге гимназия-интернат) математиканан белем бирә. Тырыш хеҙмәте өсөн “РСФСР-ҙың халыҡ мәғарифы отличнигы” тигән маҡтаулы исемгә лайыҡ була. Мария Зыя ҡыҙына мөғәллимлек һәләте Хоҙайҙан бирелгәйне, тип хәтерләй хеҙмәттәштәре, уҡыусылары. Үҙ өҫтөндә даими эшләгән, тыныс холоҡло, сабыр уҡытыусының абруйы ҙур була. Үҙенең өс балаһына ла яҡшы тәрбиә, юғары белем бирә Мария Зыя ҡыҙы. Бөгөн ул ошо тырышлыҡтың емештәрен татып, ейән-ейәнсәрҙәр, бүлә-бүләсәрҙәр һөйөүен һәм ихтирамын тойоп йәшәй.

Бер быуатлыҡ ғүмер! Мария Зыя ҡыҙы лайыҡлы үтә уны, ошо осорҙағы тарихи ваҡиғаларҙың шаһиты ғына булмай ул, ә уларҙың уртаһында ҡайнап йәшәй. Нимәләр генә кисерергә тура килмәһен, көслө кеше булып ҡала, яҙмыш һынауҙарын лайыҡлы үтеп, бөгөн дә тормоштан йәм табып йәшәй. Педагогия хеҙмәте ветерандары, уҡытыусылар коллективы, Әхмәтзәки Вәлиди исемендәге 2-се гимназия-интернатының уҡыусылары һәм шәхсән үҙемдең исемдән Уҡытыусыбыҙҙы олуғ юбилейы, данлы ғүмер байрамы менән
ҡотлайбыҙ! Сәләмәт булығыҙ, Мария Зыя ҡыҙы!