“Бер күрҙем һәм ғүмергә һөйҙөм!”

Арлар ауылында йәшәгән Тайба менән Ибраһим ВАФИЕВТАР 65 йылдан һуң да бер-береһенә булған йәшлек хисен һүндермәй.

1 октябрь – Халыҡ-ара оло йәштәгеләр көнө

Арлар ауылында йәшәгән Тайба менән Ибраһим ВАФИЕВТАР 65 йылдан һуң да бер-береһенә булған йәшлек хисен һүндермәй.

Тайба инәйгә - 86, Ибраһим бабайға 89 йәш тулып килһә лә, йәштәрҙән ҡалышмай донъя көтәләр. Мал-тыуарҙары ла, ҡош-ҡорттары ла бар, умарта ла тоталар, баҡса тултырып йәшелсә-емеш үҫтерәләр.

Беҙ барып ингәндә был йортта гөрләп ҡаҙ өмәһе бара ине. Тайба инәй үҙе лә ең һыҙғанып эштең уртаһында ҡайнай.

- Быйыл 22 ҡаҙ үҫтерҙем. Ҡыҙым ҡайтҡанда шуларҙы эшкәртеп ҡуйырға тип күмәкләп тотондоҡ, - тип ихлас килеп күреште хужабикә беҙҙе ҡапҡа төбөндә үк ҡаршылаған бабайына йылы ҡараш ташлап. Әйткәндәй, бынан күп йылдар элек улар араһында һөйөү уты ла ана шул йылы ҡараштан тоҡана ла инде. Тәү күреүҙән ғашиҡ була улар бер-береһенә.

Арлар егете менән Һайран ауылы ҡыҙын яҙмыш ҡайҙа осраштырған һуң?

- Ибраһимды үҙебеҙҙең ауылда урамдан үтеп барған сағында бер генә күреп ҡалдым да шунда уҡ оҡшаттым. Тәү ҡараштан һөйөү була икән ул. Миңә беренсе мөхәббәтемә тормошҡа сығып, 65 йылдан артыҡ бергә йәшәү бәхете тейҙе, - тип йылмайҙы Тайба инәй.

Әхирәте менән Арлар ауылына барғанда егет йәнә ҡыҙҙың юлына тап була, шунда танышып һөйләшеп китәләр. Ауылына ҡайтырға сыҡҡан Тайбаны Ибраһим оҙатып уҡ ҡуя.

- Тайба ла шунда уҡ күңелемә оҡшаны. Бүтәнгә ҡарап ҡуймаһын тип, ҡыҙҙы тиҙерәк кәләш итеп алыу яғын ҡараным. Ҡатынымдан уңдым, күңелем яратҡан менән ҡауышып, бәхетле йәшәнек, - тип һүҙгә ҡушылды Ибраһим бабай.

Дүрт ҡыҙҙары һәм бер улдары донъяға килә Вафиевтарҙың. Оҙаҡ ҡына ваҡыт ситтә лә йәшәп алалар. Ләкин тыуған тупраҡ көсө ныҡ булып сыға. Хаҡлы ялға сыҡҡас, йәнә Арларға ҡайтып төпләнәләр.

- 65 йыл күп тә кеүек түгел. Тиҙ генә үтте лә китте. Матур йәшәнек, ғүмерен дә, бәхетен дә бирҙе Хоҙай, балаларыбыҙҙан да ҡәнәғәтбеҙ, - ти улар.

Балалары тигәндән, береһе - Ҡырымда, икенсеһе - Алма-Атала, өсөнсөһө Амур өлкәһендә донъя көтә. Ҡалған икәүһе Стәрлетамаҡта һәм Салауатта йәшәй. Ата-әсәләрен иғтибарҙан өҙмәһәләр ҙә, оло йәштәге инәй менән бабай үҙҙәре лә ҡартлыҡҡа бирешерлек түгел әле. Йәштән хеҙмәттә сыныҡҡан быуын әле булһа эшһеҙ тора алмай. Умарталары айыра башлаһа, бергәләп сығып китәләр, бәрәңгене лә инәй бер ҡыйынһынмай үҙе утап ҡуя икән, кәзә аҫрайҙар, уның шифалы һөтөнән өҙөлмәйҙәр.

- Уларҙың бер-береһен ҡәҙерләп тороуҙарына беҙ ҙә һоҡланабыҙ, - ти ҡыҙҙары Сәлимә. - Әле лә атайым әсәйемде “аҡҡошом” тип кенә йөрөтә. Атайым ауырып дауаханала ятҡанда әсәйем дә уның эргәһенән китмәне, төн йоҡламай ҡараны. Шул йылылыҡты күреп, тойоп үҫтек. Әле лә улар менән кәңәшләшәбеҙ, әйткәндәренә ҡолаҡ һалабыҙ, яндарына ашҡынып ҡайтабыҙ. Әсәйемдең өйҙә атай мәртәбәһен юғары ҡуйыуы, һәр нәмәне бергәләп кәңәшләшеп эшләүҙәре – былар барыһы ла уларҙың бәхетле йәшәүҙәренең нигеҙе.

Фото: автор.

Читайте нас:

Новости партнеров

1 ғинуарҙа саҡ үлемдән ҡалған

На уровне молекул

“Ана капиталы” акчасы калган иде

Регистрационный номер ПИ ТУ02-01361. Свидетельство выдано Управлением Федеральной службы по надзору в сфере связи, информационных технологий и массовых коммуникаций по Республике Башкортостан от 24.07.2015 г.

Новости, статьи, другие публикации, а также фото-, видео-, графические материалы являются объектами авторского и исключительного права газеты «Торатау». Перепечатка допускается только по согласованию с редакцией. Ссылка на авторство газеты «Торатау» обязательна. Для интернет-изданий прямая активная гиперссылка на сайт газеты «Таратау» обязательна.

Телефон

8(34794) 2-68-45

Электрон почта

[email protected]

Адресы

453200, город Ишимбай, ул. Советская, 88

Реклама хеҙмәте

8(34794) 4-11-22, 8-917-45-44-640

Редакция

8(34794) 2-68-45

Ҡабул итеү бүлмәһе

8(34794) 3-22-75

Хеҙмәттәшлек

8(34794) 3-22-75