70 йыл бергә !

Ғүмер тигәнең тиҙ генә үтә лә китә икән ул. Беҙҙең атай менән әсәйгә лә 86-ар йәш булып киткән. Улар икеһе лә Ҡанаҡай ауылында тыуып-үҫеп, 16 йәштә генә ҡауышып, 70 йыл бергә ғүмер итәләр.

Ғәбиҙә Яҡуп ҡыҙы менән Байтимер Сәйетғәле улы АЛТЫНБАЕВТАР – икеһе лә хеҙмәт ветераны, ғүмер буйы “Коммунизм” колхозында арымай-талмай хеҙмәт иттеләр. Механизатор атайым “ҡорос аты” менән ялан-ҡырҙарҙы гиҙһә, сөгөлдөрсө әсәйем хаҡлы ялға сыҡҡансы баҫыуҙан ҡайтманы. Ауыр хеҙмәт, 8 бала уларҙың һаулығын ҡаҡшатты, әлбиттә. Бөгөн беҙ атай-әсәйебеҙ алдында үҙебеҙҙең балалыҡ бурысыбыҙҙы үтәргә, нисек тә булһа тормоштарын еңеләйтергә, ҡартлыҡтарын йәмләргә тырышабыҙ. Ғаиләлә иң өлкәне булған Фәриҙә апайыбыҙ (фотола) уларҙы тәрбиәләргә тип Өфөнән үк күсеп ҡайтты. Ләкин ҡаҡ-шаған һаулыҡ үҙенекен итә, ғәзиздәребеҙ даими медицина ярҙамына мохтаж. Бәхеткә күрә, ауылыбыҙҙың фельдшер-акушер пункты хеҙмәткәрҙәре оло быуынға айырыуса иғтибарлы. Гөлсинә Ғилметдин ҡыҙы Аҡбулатова менән Сажиҙә Рәсүл ҡыҙы Ҡотлоева атай-әсәйебеҙҙең хәлен һорашып, тейешле дауаһын биреп тора. Көнмө-төнмө, кәрәк саҡта һәр саҡ ярҙамға ашығалар. Матур һүҙ – үҙе йән аҙығы, дарыу-уколдар менән генә түгел, йылы, ихтирамлы мөнәсәбәттәре менән дә ҡарттарҙың йәнен дә, тәнен дә дауалай улар.