Минзәлә МЫРҘАБАЕВА: “Ҡулға алған китаптың йылыһы ҡала...”

Күп йылдар ҡалабыҙҙың Үҙәкләштерелгән китапхана системаһында хеҙмәт иткән Минзәлә Мырҙабаеваны китап донъяһына юл һалыусы тип һоҡланып әйтә алабыҙ. Һөнәреңә күңел ҡушыуы буйынса килеү – ҙур бәхет, ти замандашыбыҙ.

Күп йылдар ҡалабыҙҙың Үҙәкләштерелгән китапхана системаһында хеҙмәт иткән Минзәлә Мырҙабаеваны китап донъяһына юл һалыусы тип һоҡланып әйтә алабыҙ. Һөнәреңә күңел ҡушыуы буйынса килеү – ҙур бәхет, ти замандашыбыҙ.

Китапханала үтеп торған төрлө әҙәби кисәләр, мауыҡтырғыс викториналар, яңы китап менән таныштырыу булһынмы, һәр сараның уртаһында ҡайнай Минзәлә Хәйрулла ҡыҙы. Ижади күңеле уны “Торатау” гәзите менән дуҫлығын да йылдан-йыл нығыта. Күптән түгел редакция яҡташ яҙыусыбыҙ Ибраһим Ғиззәтуллиндың

100 йыллығына арнап иғлан иткән викторина ла - уның хеҙмәте.

- Ибраһим ағайҙың ныҡлы рух өлгөһөн күреп, уның әҫәрҙәрен уҡып үҫтек, - ти үҙе лә Түбәнге Әрметтә тыуып үҫкән әңгәмәсем. – Районыбыҙҙан бик күп яҙыусылар, шағирҙар, төрлө өлкәлә уңыш ҡаҙанған шәхестәр сыҡҡан. Уларҙың тормош юлына ихтирамлы, иғтибарлы булайыҡ, тип әйтмәксемен. Мин үҫмер саҡта ауылда Ҡобора Ғәзизова, Рәшиҙә Ғәтиәтуллина апайҙар китапхана эшен шундай дәртле итеп алып барҙы, уларға оҡшарға теләп тә ошо һөнәрҙе һайлағанмындыр. Ауылдан бер йылда өс ҡыҙ Өфө китапхана техникумына һынау тоторға юлланғайныҡ, миңә генә үтергә яҙҙы. Яратҡан һөнәремдән ләззәт алып эшләүемә 34 йыл булып киткән. Коллективыбыҙҙа ҡырҡ йылдан ашыу эшләгән хеҙмәттәштәрем бар, күңелде ныҡбиләп алған эшкә генә тоғро ҡалып булалыр ул.

Әсәй-атайҙан күрмәксе, Минзәлә ханым менән Сафый Ғазали улының ике ҡыҙы ла белемгә ынтылышлы булып үҫкән, өлкәне нефть университетын тамамлаһа, кесеһе оҙаҡламай ҡулына табип дипломы аласаҡ.

ХХ быуат китап уҡыусыһы һәм хәҙергеһе. Айырма бармы? Әлеге көндә ҡала китапханаһында хеҙмәтләндереү бүлеген етәкләгән Минзәлә Хәйрулла ҡыҙының был һорауға яуабы ла фәһемле.

- Китапханала эшләй башлағанымда халыҡ сират тороп китап ала, күп уҡый ине. Совет, сит ил классиктары ҡулдан-ҡулға йөрөнө. Уҡыу залдары туп-тулы була торғайны. Шунан бер дәүер ил кисергән иҡтисади ауырлыҡтар рухи ынтылыштарҙа ла сағылды. Яңы быуын йәштәрендә баҫма һүҙгә ниндәйҙер битарафлыҡ тойолдо. Әммә әлеге китап уҡыусылар, китапхана мөмкинлектәре өсөн ихлас һөйөнәм. Бөгөн йәнең теләгән китапты, баҫмамы, электрон варианттамы, табып уҡырға була. Интернет селтәре лә уҡыйым тигән кешегә бик күп юлдар аса. Китапханаларҙағы заманса техник мөмкинлектәр сараларҙы мауыҡтырғыс, йөкмәткеле итеп ойоштороуға булышлыҡ итә. Мәктәп уҡыусылары бик әүҙемләште, уҡыу программаһы буйынса әҫәрҙәрҙе баҫма китап аша уҡырға теләйҙәр. Ҡулға алған китаптың йылыһы ҡала, тойғолар байыраҡ була тиҙәр, бик дөрөҫ был.

Үҙен кешеләр мәҙәниәтен, рухиәтен үҫтереүгә бағышлағандар оло ихтирам уята. Китапханасы – нисек ғорур яңғырай!

Фото: автор.

Читайте нас: