Мал йәнле Сәлимә

Үҙенең яуаплы, еңелдән булмаған һөнәре тураһында участка ветеринария фельдшеры Сәлимә Усманова тыныс итеп һөйләй.

Сәлимәнең тамырҙары ауылдан, ябай крәҫтиән ғаиләһендә тыуған ҡыҙ бала саҡтан ауыл тормошон белеп үҫә. 1990 йылда Стәрлетамаҡ совхоз-техникумын уңышлы тамамлап, тыуған ауылы Сәлихҡа эшкә ҡайта һәм хеҙмәт юлын Салауат Юлаев исемендәге колхозда башлай. Ауыр 90-сы йылдар. Производство, мал башының кәмеүе, финанс тотороҡһоҙлоҡ, үҙенең дә ғаиләле булыуы, балалары тыуыуы - быларҙың барыһы ла уның сибек кенә елкәһенә ята. Ауырлыҡтар, билдәһеҙлек осорҙары ла була, әммә Сәлимә Мөхәмәт ҡыҙы юғалып ҡалмай, төшөнкөлөккә бирелмәй, улдарын тәрбиәләп үҫтерә, һайлаған һөнәренә хыянат итмәй, хужалыҡ фермаһында эшен дауам итә. Ауылдаштарына ла, тәүлектең ниндәй генә ваҡыты булмаһын, ярҙамға ашыға. Белгестең тырышлығын, эшенә яуаплы булыуын күреп, 2006 йылда Сәлимә Усманованы дәүләт ветеринария хеҙмәтенә эшкә саҡыралар һәм бөгөнгө көнгә тиклем ул Сәлих ветеринария участкаһында эшләй. Әхмәр, Ҡанаҡай, Сәлих, Әптек, Козловка, Ивановка ауылдарын һәм ике хужалыҡты – Едих крәҫтиән-фермер хужалығын һәм “Салауат” яуаплылығы сикләнгән йәмғиәтен хеҙмәтләндерә.

Ветеринария хеҙмәтенең төп бурысы булып кешеләрҙең, малдарҙың именлеген тәьмин итеү, етештерелгән ауыл хужалығы продукцияһының сифатын контролдә тотоу, яҙғы, көҙгө профилактик прививкаларҙы, диагностик тикшеренеүҙәрҙе ваҡытында үткәреү тора.