Автобустарға ни булған?

Һуңғы осорҙа редакцияға район пассажир маршруттарында өҙөклөктәр булыуына, йә бөтөнләй автобус йөрөмәүенә бәйле күп кенә мөрәжәғәттәр булды. Ишәй, Әхмәр, Кинйәкәй, Маҡар, Көҙән, Ҡолғона тарафтарынан шылтыратыусыларға яуап биреү маҡсатынан район хакимиәтенең ҡулланыусылар баҙары, хеҙмәттәр һәм эшҡыуарлыҡ бүлеге начальнигы Азат ХАННАНОВҡа һәм район буйынса маршруттарҙы хеҙмәтләндереүгә яуаплы “Башавтотранс” дәүләт унитар предприятиеһының Салауат ҡалаһындағы филиалы етәксеһе Азат ҒӘЛИЕВҡа мөрәжәғәт иттек.

– Пассажирҙар йөрөтөү буйынса беҙҙең иң ҙур проблема Ишембай - Ҡолғона маршрутында булды. “Башавтотранс” предприятиеһы филиалы был йөкләмәне үтәй алмауы арҡаһында маршрутты хеҙмәтләндереүгә асыҡ конкурс үтте. Һөҙөмтәлә шәхси эшҡыуар С. Колесников еңеп сыҡты һәм 9 августа Ҡолғонаға автобустар йөрөүе көйләнде. Хәҙер был маршрут буйынса автобус дүшәмбе – кесе йома көндәре Ишембайҙан иртәнге сәғәт 8-ҙә сыға, 11.30-ҙа Ҡолғонала була. Йома көнө Ишембайҙан көндөҙгө сәғәт 4-тә сыға һәм 19.00 Ҡолғонанан ҡуҙғала. Шәмбе, йәкшәмбе көндәре лә берәррейс буласаҡ. Шәхси эшҡыуар маршрут графигына үҙгәрештәр индергәндә алдан хәбәр итеп торасаҡ.

– Эйе, һуңғы осорҙа Ишембай районы ауылдарына бер нисә йүнәлештә пассажирҙар автобустары йөрөүендә өҙөклөктәр булды. Бында иң төп сәбәп - предприятиеның техника паркы иҫкереүендә. Автобустар йыш ватыла, ошо арҡала водителдәр ҙә эштән китә. Әммә беҙ хәлдән сығыу юлын табабыҙ. Кинйәкәйгә, мәҫәлән, маршрутты Верхотор менән бәйләнек. Петровскийҙан киткән йүнәлештәрҙе өс автобус хеҙмәтләндерә. Унда ла автобус ватылып, тотҡарлыҡ булды.