Сыңлап торҙо ялан

Байғужа тарафтарында “Сыңла, салғы!” фольклор конкурсы үтте.

Ҡырмыҫҡалы районында республика кимәлендә ойошторолған ошо ише байрамдан уҙған йыл еңеү менән ҡайтҡан биләмә уңғандары быйыл халыҡсан ярышты үҙендә гөрләтте.

Биләмә хакимиәте ярҙамына таянып, Кинйәбулат мәҙәниәт йорто дәртлеләре күтәреп алған сара күрше ауылдарҙа йәшәүселәрҙе лә ҡыҙыҡһындырмай ҡалманы. Шулай булмайса, салғысылар менән бер рәттән урман ашы әҙерләү, миндек бәйләү, сәскә таждары яһау буйынса ла еңеүселәр билдәләнде бит.

- Ҡыҙыу бесән мәлендә халыҡты эштән айырып булырмы икән, тип борсолғайныҡ. Ҡаланан, күрше-тирә ауылдарҙан ҡатнашыусыларҙы күреп шатландыҡ. Тик ир-егеттәр аҙыраҡ, бигерәк тә йәштәр юҡ. Күрәһең, салғы беҙҙең быуын ҡулынан төшөп бара - техника заманы, - ти Кинйәбулат мәҙәниәт йорто мөдире Виктория Ғәлимова. – Бындай шәп сараны үҙебеҙҙә лә үткәрергә кәрәк тип, уҙған йыл республика конкурсынан илһамланып ҡайтҡайныҡ. Ғөмүмән, уны район күләмендә лә бик матур ойошторорға була.

Афарин башлап ебәреүселәргә! Таҫыллыҡ, уңғанлыҡ, ҡорал тотоп эшләй белеү һәр заманда ла кәрәк, “Сыңла, салғы!” байрамы асылында ошо фекер ята ла инде. Ир-егеттәр -100, ҡатын-ҡыҙҙар 30 метр араны мөмкин тиклем тиҙ һәм таҙа сабырға тейеш ине. Яланға усаҡ, тәмле аштар, яңы сабылған үлән еҫе таралды.

Ишморат ағай, саҡ ҡына тын ал, һиңә берәү ҙә етерлек түгел! - Юлын киң алып, ҡолас йәйеп сапҡан Бәләкәй Байыҡтан Ишморат Мозафаров, ысынлап та, еңеүсе булып сыҡты. Икенсе һәм өсөнсө урындарҙы Кинйәбулаттан Әҡсән Сираев менән Ишембайҙан Юнир Ҡолбирҙин ағайҙар бүлеште. Ҡатындар араһында иһә Биксәндән Зөлфиә Рәхмәтуллина берәүҙе лә алдына сығарманы. Кинйәбулаттан Мәҙинә Мөхәмәҙиева һәм Зәйтүнә Хәкимова ла, күрәһең, бәләкәйҙән салғы тотоп, күмәк эшкә ылығып үҫкән. Улар иң яҡшы һөҙөмтә күрһәтте. Әйткәндәй, бүләктәр ҙә шәп ине. Еңеүсегә – электр триммеры! Урман ашын бешереүселәр араһында 20 төр ризыҡ әҙерләп өлгөргән Рәүиә Сираева беренсе булды, Әлиә Ҡорбанғәлиева һәм Әлиә Фәтҡуллина ла бесәнселәрҙе яланда ғына ауыҙ итә торған аштар менән һыйланы.

Йыр-бейеүгә маһирҙар, салғысыларға ял биреп, иң матур сығыштарын бүләк итте. Район мәҙәниәт бүлегенән Нәсимә Собханғолова, байрам йөкмәткеһен юғары баһалап, еңеүселәрҙе ҡотланы - халыҡсан байрам артабан йола булып етешһен, ауыл егәрлеләрен күтәрһен!