Бәхетлеләр... сәйәхәт итә

Йәй күптәр өсөн көтөп алынған ял, сәйәхәттәр миҙгеле. Кемдер гүзәл Башҡортостан тәбиғәтен, киң билдәле шифаханаларыбыҙҙа ял итеүҙе һайлай, икенселәр йыл буйы тигәндәй сит илгә путевкаға аҡса йыя Иҡтисади көрсөк тигән нәмәне йырып сығып киләбеҙмелер, юҡмы, һәр хәлдә, туристик компаниялар, фирмалар аҙым һайын. Ҙур булмаған ҡалабыҙҙа ғына улар һаны тиҫтәгә етә. Тимәк, һорау бар. Ишембайҙарҙың мөмкинселеге нисегерәк икән һуң? Яҡташтар ҡайҙа, нисек ял итеү юлын хуп күрә? Әлбиттә, был һорауға туризм өлкәһендә эшләүселәр яуабы ҡыҙыҡһындырҙы.

- Уҙған йыл, ысынлап та, туристик компаниялар бер аҙ ауырлыҡтар кисерҙе, туроператорҙар селтәренә бәйлеләре араһында ябылғандары ла булды, - тип уртаҡлашты Ишембайҙа ун йылдан ашыу тотороҡло эшләп килгән ”Пегас туристик“ туризм агентлығы етәксеһе Лидия Козлова. – Сер түгел, сит илдә ял итеү, ғаилә менән төрлө ерҙәрҙе күреү хыялы бөтәбеҙгә лә хас. Ә бына килем төрлө. Әммә сараһын табырға була. Кредитҡа ял итеүселәр ҙә бар, иң отошлоһо, әлбиттә, юлламаға алдан заказ биреп, хаҡтар түбән саҡта алып ҡуйыу. Йылдар тәжрибәһенән сығып, ишембайҙар әүҙем туристар тип әйтә алам. Рәсәй буйынса төрлө маршруттар, Ҡазанға сәйәхәттәр популярлашты. Абхазия, Сочи, ғөмүмән Краснодар крайы, Ҡырымға ял итергә барыусылар ҙа арта. Үҙебеҙҙә ял файҙалыраҡ тигән ҡараш нығына. Осһоҙораҡҡа төшәме-юҡмы, уныһы бәхәсле. Башҡортостан шифаханаларында ял итергә теләүселәр иһә уларға тура мөрәжәғәт итеүсән. Һаулыҡтарын нығытыу яғын уйлағандар, тулы курс ҡиммәт кенә булһа ла, тап шифаханаларҙа ял итеүҙе хуп күрә.

Ҡыҙыҡлы фекер ҙә әйтеп ташланы әңгәмәсем – сит илгә туристар ағымы күп осраҡта Себер тарафтарында эшләүсе яҡташтарыбыҙ иҫәбенә һаҡлана икән. “Бындағыларҙың” кеҫә яғы бюджетлыраҡ ялды һайларға, йә оҙаҡ ҡына маҡсатлы аҡса йыя барырға ҡуша, тимәк.

Ошо көндәрҙә генә ғаиләһе менән Ҡырымда ял итеп ҡайтҡан хеҙмәттәшебеҙ Лилиә Боровикова ла белгес әйткәндәрен ҡеүәтләне.

- Иремдең эшенән бирелгән юллама буйынса Алушта ҡалаһында “Зәңгәр тулҡын” пансионатында ял иттек. Совет заманынан ҡалған төҙөлөштәр, аҙыҡ-түлеккә, йәшелсә-емешкә, бензинға хаҡтар күпкә ҡиммәт. Ябай ғына пансионатта өс тапҡыр туҡланыу менән бер көнлөк ял уртаса 1500 һумға төшә. Яңы күпер буйынса үтергә тура килмәне, самолетта остоҡ. Аэропорт яңы, уңайлы. Диңгеҙ тап-таҙа, кешеләр ихлас, өлкәндәр һәм балалар өсөн аттракциондарҙың төрлөһө бар – шуныһы оҡшаны. Әгәр ял хаҡын тулыһынса үҙебеҙгә түләргә кәрәк булғанда уйланыр инек – бөтә уңайлыҡтары булған сит ил курортын һайларғамы, әллә Ҡырымда ял итергәме. Әммә бында бер булғандар Ҡырымға ҡабат-ҡабат ҡайтыусан, тимәк, ниндәйҙер тартыу көсө бар.

Туризм агентлыҡтарының төрлөһө бар беҙҙә. Улар барыһы ла һуңғы йылдарҙа сит илдәр араһында Төркиә, Тунис, Вьетнам, Таиланд, Берләшкән Ғәрәп Әмирлектәре, Кипр ҙур һорау менән ҡулланылыуын билдәләй. Төркиә был тәңгәлдә алдынғылыҡты берәүгә лә бирмәй. Европа илдәрен асыусы яҡташтарыбыҙ ҙа йылдан-йыл арта икән. Күптән түгел Европа ҡалалары буйлап бер кешегә 50 мең һум иҫәбенән автобус турында булып ҡайтҡан танышым әле булһа кисерештәрен онота алмай: донъя күреп йәшәргә кәрәк! Һөнәре буйынса уҡытыусы егет хәҙер киләһе сәйәхәтенә аҡса йыя башлаған.

Уҙған йыл Ишембайҙа Йәштәр урамы, 2А адресы буйынса сағыу атама аҫтында асылған “Дубай” туризм агентлығына һуғылам. Апалы-һеңлеле Динә менән Гөлшат Бибаковалар күп кенә яҡташтарыбыҙға таныш. Әсәләренең эшҡыуарлыҡ юлын дауам итеүсе егәрле, йүнсел, алдынғы ҡарашлы ҡыҙҙар.

- Ошонда тыуып үҫкәнбеҙ, уҡығанбыҙ, беҙҙе күптәр белә һәм ошо ышанысты аҡлау, хатта ғаилә абруйын һаҡлау тип әйтеү дөрөҫ булыр, эшебеҙҙе юғары кимәлдә алып барыуҙан тора, - ти Гөлшат. – Клиенттарыбыҙ төрлө, ғаилә менән ялдың күпме сығымдар талап иткәнен аңлап, путевкаларҙы мөмкин тиклем отошло осорҙа алып ҡалыу юлдарын эҙләшәбеҙ. Эре ҡалаларҙағы агентлыҡтарҙа, турфирмаларҙа һәр бер клиент мәнфәғәте өсөн бик үк борсолмаҫҡа ла мөмкиндәр. 8-917-807-45-57 телефон һандарын йыйып та ҡыҙыҡһындырған йүнәлеш буйынса һорауҙар бирергә була.

“Дубай” тигәс тә, Ғәрәп Әмирлектәренә генә сәйәхәт ойоштороу менән сикләнмәйҙәр бында. Ихласлыҡ, хәлеңде, мөмкинлектәреңде аңлау тойолоп торған агентлыҡ аша теләгән бер илгә сәйәхәт ҡылырға була.

- Путевканы алдан юллап ҡуйыусылар һәр яҡтан ота. Әле бына ҡышҡы осорға һатыу башланды. Таиланд, Вьетнам, Һиндостан, Ғәрәп Әмирлектәре - ҡыҙыҡһыныуҙар төрлө. Был илдәргә Өфөнән тура самолет оса. Яңы йыл байрамын уйлап, әленән шул ваҡытҡа путевка алып ҡуйыусылар бар. Атай-әсәйҙәрҙе, яҡындарыңды сәйәхәткә сертификат менән бүләкләү ҙә бик матур ғәҙәткә инеп бара. Европа илдәрен бигерәк тә йәштәр һайлай, улар отелгә бәйле ялды хуп күрмәй һәм шуға ла иртәнге аш ҡына ингән путевкалар ҡулай. Өлкәнерәктәр, балалары менән килгән ғаиләләргә “all inclusive” – “бөтәһе лә ингән” булһын. Ҡайҙалыр тик Мәскәүҙән генә осоп була, Шенген илдәренә виза алыу менән дә нескәлектәр бар, барыһын аңлатабыҙ, ваҡытында юллайбыҙ - кешенең үҙенә мәшәҡәт ҡалмай тиерлек, - тип өҫтәне Динә сираттағы ял итергә теләүсе һорауҙарына яуап биргән арала.

Бәләкәй генә төҫлө флагтар менән сыбарланған глобусҡа иғтибар итәм - ярты донъяны күреп өлгөргән ҡыҙҙар! Туризм тармағында эшлә, кешеләргә төрлө илдәргә асҡыс тоттороусы бул да, донъя гиҙмә ти, әлбиттә, башҡаларға тәҡдим итер өсөн үҙеңдә һынарға кәрәк.

Билдәле рус яҙыусыһы Иван Бунин әйтмешләй, кешене был донъяла өс нәмә бәхетле итә – мөхәббәт, ҡыҙыҡлы эш һәм сәйәхәт итеү мөмкинлеге. Әҙәм балаһына, бер ҡараһаң, бәхетле булыу өсөн күп тә кәрәкмәй икән. Тик бына ысын мөхәббәттең ҙуры, бәләкәйе булмаһа, сәйәхәт ҡылыуҙың төрлө юлы, төрлө кеҫәгә ҡулайлыһы бар.