Тирә-яҡты балҡытып

– Кемдер үтә ябай тип ҡарай беҙҙең һөнәргә, әммә ҡулыбыҙ тейгәндән һуң донъялар яңырып, балҡып китеүен әйтеүселәр күберәк - ти ҡырҡ йылға яҡын хеҙмәт стажы булған Люциә Хисмәтуллина.

Эйе, ҡалабыҙ матурлығы, төҙөклөгө үҙ эшен яратып башҡарған егәрле кешеләрҙән, ябай эшсе һөнәр эйәләре тырышлығынан тора. Гөрләшеп йырлап йөрөп эшләүҙәре менән йәлеп итте был апайҙар. Ауырғазы районында тыуып, ғүмерен Ишембай менән бәйләгән Зәлиә Ғәитова коллективтың татыулығы етәкселәренең эшлекле булыуынан тигән фекерҙе лә әйтте. Айрат Ғизәтуллин етәкләгән торлаҡ идаралығы бөгөн ҡалала иң уңышлылар рәтендә.

- Ошо көндәрҙә генә Совет урамының 42-се йортонда подъездар ремонтын тамамланыҡ. Йортта йәшәүселәр үҙҙәре лә ярҙам итергә тора, - ти Зәлиә Ансарул ҡыҙы. Йортта йәшәүселәр тигәндән, беҙ һөйләшкән арала ғына малярҙарға бер күпме кеше рәхмәт әйтеп китте. Ә 27-се йорттан Дмитрий Васильев үҙендә тотонолмай ҡалған бер нисә төҫлө буяу булыуын, уларҙы балалар майҙансығын биҙәү өсөн бушҡа бирергә әҙер икәнен әйтте. Бына ошондай кешеләр арабыҙҙа күберәк булһын ул: һөнәренән уңғандар, тырыштар, йәмғиәтебеҙ үҫеше үҙебеҙҙән дә тороуын аңлаусылар.