Һөнәрендә үҙен тапҡан

Бәйән ителәсәк фекерем ана шундай һөнәр кешеләренең береһе – үҙ эшенең оҫтаһы булған теш табибы, хирург-стоматолог тураһында. Күптәр табип-стоматологтарға барырға бик атлығып тормай. Сәләмәтлек үҙебеҙҙең ҡулда, тип ҡабатларға яратһаҡ та, табиптан уңыу тигән нәмә лә бар бит әле. Уның да үҙ эшенең оҫтаһы булыуы мөһим. Ишембай ҡалаһының стоматология поликлиникаһында тиҫтә йылдар һайлаған һөнәренә тоғро ҡалып хеҙмәт итеүсе, сығышы менән Әхмәр ауылы егете, тәжрибәле һәм оҫталығы менән танылған хирург-стоматолог Закир Байтимер улы Ҡаһиров бөтә яҡлап та маҡтауға лайыҡ. Үҙ һөнәрендә үҙен тапҡан кеше ул. Ошо өлкәлә дөйөм хеҙмәт стажы - 33 йыл.

Уның эш кабинеты янында ғәҙәттә пациенттар күп була. Улар менән Закир Байтимер улы матур итеп ихлас йылмайып, мөләйем ҡараш менән мөғәмәлә итә, тештәрҙе мөмкин тиклем ауыртыуһыҙ дауаларға, хеҙмәттәрҙе сифатлы итеп башҡарырға тырыша. Ул һыҙлаған тештәрҙе сафландырып ҡына ҡалмай, пациенттарға матурлыҡ һәм сәләмәтлек өҫтәп тештәр ҡуя ла.

Йылмайыу – кеше йөҙөнөң көҙгөһө, тиҙәр. Кешенең ауыҙында матур, һау тештәр булһа, ул тағы ла матурланып китә, һаулығы ла яҡшыра. Бына шуның өсөн тырыша ла инде хирург-стоматолог Закир Ҡаһиров. “Кешелер күҙҙәрендә балҡыш, йөҙҙәрендә шат, сәләмәт йылмайыу – минең бөтә хеҙмәтем булмышы, тормош девизым”, - ти ул.

Ир кеше үҙ ғүмерендә өс бурысты үтәргә тейеш тиҙәр: балалар үҫтереү, өй һалыу, ағас ултыртыу. Закир Байтимер улына килгәндә, ул был бурыстарҙы лайыҡлы үтәгән. Тормош иптәше Мәүсилә менән бынамын тигән өй һалып ингәндәр, заманса йорт-ҡуралары бар, ағастар ҙа ултыртылған, Эльвира һәм Индира исемле матур ҡыҙҙар үҫтергәндәр. Ҡыҙҙары ла аталарына оҡшап табип һөнәрен һайлағандар һәм әлеге көндә Өфө дәүләт медицина университетында уҡып йөрөйҙәр. Һөнәре буйынса юғары белемле инженер-технолог булған Мәүсилә Закирҙың бар эшендә лә алыштырғыһыҙ ярҙамсы, донъя көткәндә ышаныслы терәге.

Әйтергә кәрәк, бындай уңыштарға тик эшһөйәр, тырыш, таҙа күңелле кешеләр генә өлгәшә ала. Закир Байтимер улына киләсәктә лә дауаланыусылар рәхмәтен ишетеп эшләргә булһын, Хоҙай Тәғәлә уны ҡулдарының ҡотонан, ырыҫынан айырмаһын, ҡатыны Мәүсилә менән бергә ҡыҙҙарының уңыштарына һөйөнөп бәхетле ғүмер итергә насип булһын.