Ҡауыны ла, кишере лә мул үҫһен

Еүеш, һалҡын һауа торошо булғанда үҫемлектәргә фитофтора тигән бәшмәк ауырыуы янай. Бәрәңге, помидор, борос, баклажан кеүек йәшелсәләргә ул ныҡлы зыян һала, япраҡтары көрәнәйеп һәләк була. Ошо ауырыуҙан һаҡланыу өсөн алдан профилактик сара күрергә кәрәк. Бының өсөн мин ошондай ябай ғына бер алымды ҡулланам. 7-8 литр һыуға 2 литр айыртылған һөт һалам, шунан 30 тамсы 5 процентлы йод тамыҙам һәм бутап үҫентеләргә һибәм. Был алымды үҙемдең баҡсамда ҡулланғаным булды һәм файҙаһы бар. Әлбиттә, фитоспорин кеүек дарыуҙар ҙа етерлек, уларҙы ла инструкцияһы буйынса ҡулланырға мөмкин.

Кишер сәскәндә тупраҡҡа тәрән итеп һыҙыҡ һыҙам һәм шул юлға мул итеп һыу ҡоям. Орлоҡто рәт буйлап тотошлай һибеп сыҡмайым. Ә 3-4 орлоҡ һалам да 5 сантиметр ара ҡалдырам, йәнә бер нисә орлоҡ һалам да ара эшләйем. Өҫтөн тупраҡ менән күмәм, ләкин һыу һипмәйем. Сөнки һыу һипһәң ер ҡата, орлоҡҡа тишеп сығыуы бик ауырға тура килә. Ҡайһы саҡта шулай орлоҡ сыға алмай ҡала. ”Кишерем сыҡманы ла ҡуйҙы” тиеүселәрҙең сәбәбе шуға бәйле булыуы ихтимал. Бындай алымды мин ябай кишер орлоғо өсөн ҡулланам. Ул орлоҡто сарыф итмәҫкә ярҙам итә, шулай уҡ һирәкләгәндә лә еңел була. Көн һалҡынса икән, түтәлдең өҫтөнә полиэтилен ябып тороу ҙа тиҙерәк сығырға ярҙам итә. Көндәр эҫе тора икән, уны алырға кәрәк. Сөнки үҫентенең бешеп ҡуйыуы ихтимал. Ғөмүмән, орлоҡ төртөп сыға башлау менән полиэтиленды алыу кәрәк, сөнки кишер һалҡында ла бирешмәй.