Өмәләргә бергәләп, дәртләнеп!

10 апрелдән 16 майға тиклем район һәм ҡалабыҙҙа экологик өмәләр барасаҡ.

Өмә - бер-береңә ярҙам итешеп йәшәү йолаһы беҙҙең халыҡтың ҡанына һеңгән. Ул бура күтәреүме, һуғым, ҡаҙ өмәһе булһынмы, ҡатын-ҡыҙҙың бергәләшеп кенә генә йырып сығып була торған мәшәҡәттәреме – бер-береңә ярҙам итеүҙе изге эштәй күргән замана кешеләре әле беҙ. Ҡыҙыл әләмдәр аҫтында атай-әсәйҙәрҙең үҙең өсөн дә кәрәк, йәшәгән ерең өсөн дә файҙалы эшкә күмәк, дәртле тотоноуын күреп үҫкән быуын. Әллә ҡайҙан иҫкән елдәр үҙеңдең донъяңды ғына хәстәрләүҙе, бейек ҡоймаларға бикләнеп, үҙ ҡаҙаныңда ғына ҡайнап йәшәү рәүешен тағып маташһа ла, бирешмәйек, иптәштәр, өмәгә сығайыҡ!

Кемгә кәрәк ул яҙлы-көҙлө өмәләр? Үҙебеҙгә! Кисә генә тырматҡан, һепергән ерҙәреңдең көндән көн йәшеллеккә күмелә барыуын күҙәтеп шатланыр өсөн,таҙа ғына урамдарҙан ялтыр ғына туфлиҙарҙа үтер өсөн, әле бер, әле икенсе ерҙең күмәк көс менән төҙөкләнеүен, ағартылыуын, матурланыуын күреп, ерҙәштәрең менән ғорурланыр өсөн...

Эш хакимиәттән төшөрөлгән ҡағыҙҙа ғына түгел, шөкөр, быны күбебеҙ аңлай. Яҙғы өмә акцияһының маҡсаты – ҡала һәм ауыл биләмәләрен таҙартыу, төҙөкләндереү һәм йәшелләндереү тиелә һәр предприятие, учреждениеға, төрлө милек хужаларына килгән рәсми хатта. Быны өҫтән ҡушыу тип, ауыр ҡабул итәбеҙ икән, тимәк ҡанға һеңгән тәрбиәне, изге нәмәләрҙе теге елдәр осортоп бөтөрөп бара?! Бирешмәйек. Беҙгә балаларға өлгө булаһы әле. Оҙон һүҙҙең ҡыҫҡаһы – тырма, һеперткеңде әҙерлә, ишек алдыңды, йорт-ҡура тирәңде тәртипкә килтерҙең икән, ҡапҡаң тышыңа сығырға ла оялма. Күңеле таҙа кеше таҙалыҡҡа ынтыла ул, бер ниндәй указы ла, рәсми хаты ла кәрәкмәй.

Дуҫтар! Эшебеҙҙе күрһәтә лә беләйек әле. “Торатау” гәзитенең Бәйләнештә төркөмө (https://vk.com/gazeta_toratay) #ИшембайҙарӨмәлә флешмобы иғлан итә, үҙегеҙҙә гөрләп барған өмәләрҙән фото, видео һалығыҙ! Иң дәррәү, ҡыҙыҡлы кадрҙарҙы бергәләп баһалаясаҡбыҙ!