Йәшәү йәме - балаларҙа

2018 йыл республикала — Ғаилә, Рәсәйҙә Ирекмәндәр йылы тип иғлан ителде. Ошоға бәйле ҡаланың үҙәк китапханаһында Ғаилә һәм Волонтерҙар йылын асыуға арналған матур сара үтте.

Нефть колледжы студенттары менән осрашыуға “Йәш ғаилә - 2015” район-ҡала конкурсы еңеүселәре, күп бала тәрбиәләүсе Роза һәм Илдус Кәримовтар балалары Юлиә, Алмаз һәм Аяз менән килгәйне. Улар ғаиләнең мөһимлеге, балалар сәләмәт, бәхетле булып үҫһен өсөн нимә эшләргә кәрәклеге хаҡында һөйләне. Йәштәрҙе Кәримовтарҙың ғаилә йолалары, ялдарын нисек уҙғарыуҙары, балаларының нимә менән шөғөлләнеүҙәре ҡыҙыҡһындырҙы. Роза менән Илдус һәр һорауға ихлас яуап бирҙе. Йәш әсәй нисек итеп матур прическалар, алҡалар эшләүе хаҡында мауыҡтырғыс итеп һөйләне. Ишембай нефть колледжы уҡытыусыһы Фирҙәүес Әғлиуллина ғаилә башлығы Илдустың нефть колледжында уҡыған сағында ниндәй тәртипле студент, хәстәрлекле ул һәм яҡшы ағай булыуын хәтерләне. Ғаилә тураһында төшөрөлгән фильмды ла сараға килеүселәр яратып ҡараны. Осрашыу һуңында алып барыусылар йәш ғаиләгә рәхмәт белдерҙе һәм бүләктәр тапшырҙы.

Фото: https://vk.com/ishbibl