Яуаплылыҡ һәм намыҫ – иң төп сифаттар

Был сара һәр кадет өсөн бик мөһим ваҡиға. Ул үҙеңә ҙур яуаплылыҡ алыуҙы, намыҫ кодексын үтәүҙе һәм илһөйәрлекте аңлата.

- Ҡәҙерле ҡунаҡтар, ата-әсәләр һәм кадеттар, һеҙҙе республика Башлығы Радий Хәбиров исеменән ҡотларға рөхсәт итегеҙ! – тип һүҙ башланы Башҡортостан Хөкүмәте Премьер-министры урынбаҫары Ирек Сәғитов. – Башҡорт кадет корпусы Волга буйы федераль округында иң яҡшы хәрби белем һәм тәрбиә биреү учреждениеларынан һанала. Уҡыу йорто Әрмәнстанда, Әзербайжанда, Ҡырғыҙстанда, Молдавияла һәм Чечняла ҡыҙыу нөктәләрҙе үткән Рәсәй Геройы Александр Доставалов исемен намыҫ менән йөрөтә. Бөгөн барыбыҙ өсөн дә тулҡынландырғыс көн, ул беҙҙең хәтерҙә оҙаҡ һаҡланасаҡ. Тәү сиратта, уҡыуҙа тырышлыҡ күрһәтеүегеҙҙе теләйем. Мин һәр саҡ: “Үҙеңде еңергә өйрәнһәң, башҡаларҙы ла еңерһең”, тигән девиз менән йәшәйем. Үҙ тормошон Ватанға хеҙмәт итеү менән бәйләгән кадет өсөн беренсе урында намыҫ, абруй, яуаплылыҡ һәм тәртип кеүек төшөнсәләр торорға тейеш. Һеҙ дуҫтарығыҙға ярҙамға килергә, республикабыҙҙы данларға, төбәк-ара ярыштарҙа, барлыҡ илһөйәрлек сараларында ҡатнашырға һәм башҡорт кадет корпусының әләмен юғары күтәреп йөрөргә бурыслы. Уҡытыусылар көнө алдынан башҡорт кадет корпусының бер төркөм хеҙмәткәрҙәрен тантаналы рәүештә ҡотлап үттеләр. Мәҫәлән,
башҡорт теле уҡытыусыһы Эльмира Ғәләүетдинова Башҡортостан Республикаһы Хөкүмәтенең аҡсалата премияһына лайыҡ булды.

- Кадет корпусында эшләүемә 10 йыл булды, - тип ихлас уртаҡлашты Эльмира Минихан ҡыҙы. – Эшем оҡшай, был уҡыу йортонда гел малайҙар, егеттәр тәрбиәләнеүенә ҡарамаҫтан, улар менән уртаҡ тел табыуы еңел. Кадеттар менән башҡорт теле һәм әҙәбиәте буйынса төрлө конкурстарҙа, олимпиадаларҙа йыш ҡатнашып торабыҙ.

Был көндә кадеттарға зәңгәр береттар ҙа тапшырылды.

- Беҙ Волга буйы федераль округының Спартакиадаһында ҡатнаштыҡ. Сарала, беҙҙән тыш, тағы Татарстан, Сыуашстан, Удмурт Республикалары, Нижегород өлкәһе кадет корпустары көс һынашты. Ярыштар өс көн дауам итте. Уҡыусылар йүгереүҙә, ғәмәли-хәрби спорт төрҙәрендә, автоматты йыйып ҡороуҙа, интеллектуаль уйындарҙа, тарих буйынса викторинала ҡатнашты. Беҙҙең кадеттар Спартакиадала яҡшы һөҙөмтәләр һәм әҙерлек күрһәтте, - тип белдерҙе 11-се класс кадеты Булат Алсынбаев. – Шулай уҡ беҙҙең кадет корпусы Волга буйы федераль округында юғары хәрби уҡыу йорттарына имтихан тапшырыу буйынса алдынғылар рәтендә килә. Шуға ла бөгөн зәңгәр береттар менән бүләкләп үттеләр. 

Кадеттарҙың ант биреү тантанаһында күп ата-әсәләр ҡатнашты, улар республиканың төрлө райондарынан, илдең башҡа төбәктәренән килгәйне.

- Улыбыҙ Арыҫлан 7-се класҡа уҡырға килде. Үҙе кадет корпусында уҡырға теләне, беҙ атаһы менән ҡаршы килмәнек. Киреһенсә, уның был ҡарарын хупланыҡ, һөйөндөк, сөнки хәҙерге заманда тәртип, лайыҡлы тәрбиә бик мөһим, - тине Иглин районынан килгән Зилә Гәрәева. – Ҡабул итеү имтихандарын уңышлы тапшырҙы, башҡорт кадет корпусына уҡырға килгәненә бер ҙә үкенмәй.

Автор фотолары.