Илһөйәрлек рухында

Бөгөн яу яланында батыр яҡташтар үҙҙәрен илдең ысын патриоттары итеп күрһәтә, олатайҙарыбыҙҙың батырлығын лайыҡлы дауам итә. Уларҙың һәр береһе тыуған илебеҙҙең именлеген тәьмин итеп, Ватанды һаҡлауға үҙ өлөшөн индерә.

5-се мәктәп директоры Ләйсән Әхмәтйәнова сараны асып, илебеҙҙең хәрби үткәне хаҡында һөйләне, Беренсе донъя, Бөйөк Ватан һуғыштарында, локаль конфликттарҙа ҡатнашыусыларҙың батырлығы миҫалдарын килтерҙе.

- Илебеҙ халҡына бер нисә тапҡыр Ватаныбыҙҙың азатлығын яҡларға тура килде, - тине ул. - Бөгөн дә махсус хәрби операция сиктәрендә Рәсәй һалдаттары Ватан мәнфәғәттәрен яҡлай. Илгә хеҙмәт итеү, уны яҡлау һәм һаҡлау нимә аңлата? Күп йылдар дауамында һалдаттарыбыҙ, офицерҙарыбыҙ хәүефһеҙлекте тәьмин итеү өсөн үҙ ғүмерҙәрен аямай илебеҙҙе һаҡлай, хәүеф менән осраша. Бөгөн шундай геройҙарҙың береһенең тарихын белеү мөмкинлеге бар. Беҙҙең саҡырыуыбыҙҙы ҡабул иткәне өсөн уға рәхмәт әйтәбеҙ. Ул үҙен генә түгел, ә әле махсус хәрби операция биләмәһендә хеҙмәт иткәндәрҙең барыһының да батырлығын сағылдыра. Яҡташыбыҙ һәр беребеҙгә өлгө булып тора, ҡыйыулыҡ һәм тәртип беҙгә теләһә ниндәй ауырлыҡтарҙы еңеп сығырға һәм маҡсаттарыбыҙға өлгәшергә ярҙам итә алыуын дәлилләй. Бөгөн ул беҙгә үҙе хаҡында һөйләйәсәк, - тине Ләйсән Дамир ҡыҙы.

Махсус хәрби операция зонаһында ҡатнашыусы, рота командиры урынбаҫары, өлкән лейтенант үҙенең хеҙмәт юлы, алғы һыҙыҡтағы көнкүреш шарттары тураһында һөйләне.

- 5-се кластан ошо мәктәптә уҡыным, етәксе абруйлы педагог Марина Вячеславовна ине. Минзилә Әмир ҡыҙы, Нина Александровна, Елена Анатольевна кеүек уҡытыусылар миңә илһөйәрлек тәрбиәһен дөрөҫ бирҙе. Мин үҙ теләгем менән генерал Шайморатов исемендәге батальонға алындым. Уға 2022 йылдың 1 авгусында ҡушылдым. Бер айҙан махсус хәрби операция зонаһына юлландым. 1 сентябрҙән рота менән алдыбыҙға ҡуйылған бурысты үтәй башланыҡ. 26 сентябрҙә беренсе тапҡыр ҡаты яраландым. Дауалау 2023 йылдың 1 ғинуарына тиклем дауам итте. Һуңынан тағы ла хәрби операция биләмәһенә юлландым. Быйыл 28 июндә икенсе тапҡыр яраландым, әлеге ваҡытта дауаланыу үтәм, ҙур булмаған операция көтөлә, - тине ул.

Уҡыусылар яугир өсөн концерт номерҙары ла әҙерләгәйне – улар шиғырҙар һөйләне, илһөйәрлек темаһына йырҙар башҡарҙы. Балалар ҡунаҡҡа төрлө һорауҙар ҙа әҙерләгән. Яугир уларҙың һәр береһенә ентекле яуап бирҙе. Мәктәптең элекке директоры Нина Мельникова яугир тураһында хәтирәләре менән уртаҡлашты.

- Бөгөн мин элекке уҡыусым менән осрашыуыма шатмын, ул һәр ваҡыт үҙ Ватанының намыҫлы, ярҙамсыл, Тыуған иленең ысын патриоты булды. Һәм был сифаттарҙы хәрби операцияла булған ваҡытта тағы ла арттырҙы. Мин уның менән ғорурланам. Элек дәрестә яуап биргәндә минең алда ҡаушай торғайны, бөгөн мин уның алдында юғалып ҡалдым. Уҡыусымдың ата-әсәһенә ошондай тоғро ир-егет үҫтергәне, тәрбиәләгәне өсөн ҙур рәхмәтемде белдерәм. Уға иҫән-һау өйөнә әйләнеп ҡайтыуын теләйем, - тине Нина Александровна.

Уҡыусыларҙы армия хеҙмәтенә әҙерләнеү һорауҙары ла ҡыҙыҡһындырҙы.

- Ни өсөн мин махсус хәрби операция зонаһына юлландым? Мин һәр ир-егет Ватанды яҡларға бурыслы тип иҫәпләйем һәм махсус хәрби операцияға ла тыуған илемә файҙам булһын өсөн барҙым. Үҙ теләге менән унда юлланыусылар, минеңсә, улар - ысын Ватан улдары. Уҡыусылар, яҡшы уҡығыҙ, һаулығығыҙҙы нығытығыҙ, спорт менән шөғөлләнегеҙ, телефонда ултырмағыҙ, илһөйәрлек темаһына китаптар уҡығыҙ, - тине яугир. - Ялан шарттарында барыһын да үҙеңә эшләргә тура килә: хәрби форманы әҙерләргә лә, йыуырға ла, ремонтларға ла... Барыһына ла өйрәнегеҙ.

Яугир хәрбиҙәргә ярҙам иткәндәрҙең барыһына ла рәхмәт белдерҙе. Балаларҙың ҡулдары менән яҙылған хаттарҙың ауыр мәлдәрҙә уларҙы нисек йылытыуын, окоп шәмдәре ярҙамында землянкаларҙа йылыныуҙарын, маскировка селтәрҙәре уларҙы дошмандан нисек ҡотҡарыуын билдәләне. Ул яҡташтарына аяҡтарын һыуыҡта туңдырырға бирмәгән йылы ойоҡбаштары өсөн рәхмәт белдерҙе.

Осрашыуҙа уҡытыусылар ике тәүлек эсендә Перегонный ҡасабаһы халҡының квадрокоптер һәм тепловизор һатып алыу өсөн аҡса йыйыуын, ҡалған 50 мең һумдан
ашыу аҡсаға машина һатып алыу өсөн тағы ла өҫтәүҙәрен әйтеп киттеләр. Улар посылкаларҙы тап беҙҙең Ишембай һалдаттарына ебәрергә тырыша.

- Халыҡ, ирекмәндәр ебәргән гуманитар ярҙам, посылкалар махсус хәрби операция зонаһына бик кәрәк, ысынлап та, унда бик күп нәмәләр етешмәй. Яугирҙарға ярҙам
күрһәткәндәре өсөн рәхмәтлебеҙ. Беҙгә газ баллондары, еүеш салфеткалар, йылы ойоҡбаштар, тепловизорҙар, квадрокоптерҙар кәрәк. Яугирҙар үҙҙәре лә аҡсаларына
машиналар, уларға запас частар һатып ала, - ти яугир.

“Дух” үҙ аҡсаһына яу яланы өсөн квадрокоптер һатып алған. Сарала ҡатнашыусы уҡыусылар яугирға алғы һыҙыҡҡа хат ҡумтаһын бүләк итте. Аҙаҡ егеттәр һәм ҡыҙҙар яҡташыбыҙ менән дөйөм фотоға төштө.

Автор фотоһы.