Шаулап үҫер шыршылар

Берҙәм эшкә ауыл мәҙәниәт йорто хеҙмәткәрҙәре һәм ағинәйҙәр ҙә тос өлөш индерҙе. Иң тәүҙә Бөйөк Ватан һуғышында ҡатнашыусы яугирҙар иҫтәлегенә ҡуйылған һәйкәл эргәһендә линейка уҙҙы.

- Акцияны башлап, һәйкәл эргә-тирәһен, мәктәп урамын йәшелләндереүгә үҙ өлөшөн индергән аҡһаҡалыбыҙ, мәрхүм Юнир ағай Тимербулатовты иҫкә алмау мөмкин түгел. Бөгөн ултыртасаҡ үҫентеләр һуғышта, махсус хәрби операцияла ҡатнашыусы атай-олатайҙарыбыҙ, бабайҙарыбыҙ, егеттәребеҙ хөрмәтенә. Беҙ уларҙы көн дә иҫкә алырға, улар өсөн доға ҡылырға тейеш, - тине үҙ сығышында Кинйәбулат мәктәбе директоры Шайморат Ғиниәтуллин.

Ауылдың “Фәтиха” мәсете муллаһы Рифат хәҙрәт акцияның изге уй-ниәттәр менән үткәрелеүен дәлилләп, доға ҡылды. Күмәкләгән – яу ҡайтарған, тигәндәй, кинйәбулаттар “һә” тигәнсе тиҫтәләгән үҫентене ултыртып та ҡуйҙы. Ике йәшлек Кәрим Сираев акцияның иң кескәй ҡатнашыусыһы булды. Ул уҡыусы апай-ағайҙарына йүгереп йөрөп ағас үҫентеләрен алып биреп торҙо.

Автор фотолары һәм видеоһы.