Уҡыуҙар башланды!

Донъяла һәм илдә коронавирусҡа бәйле киҫкен хәл килеп сығыу сәбәпле, уҡытыусылар һәм уҡыусылар компьютер, планшет, телефондарын эшкә ҡушты. Тәүге онлайн-дәресте Башҡортостан Башлығы Радий Хәбиров үҙе үткәрҙе.

“Бөгөн республикабыҙҙың 450 меңдән ашыу уҡыусыһы белем алыуҙы үҙҙәренең класс бүлмәләрендә, мәктәптәрҙә түгел, ә өйөндә, дистанциялы уҡыу рәүешендә башларға мәжбүр. Беҙ быны уңайлыраҡ итеү өсөн мөмкин булғандың барыһын да эшләргә тырыштыҡ. Әлбиттә, бар ерҙә лә шарттар бер үк түгел. Республикабыҙҙа интернет селтәренә тоташмаған ауыл мәктәптәре бар. Шулай уҡ биш-алты мәктәп уҡыусыһы булған күп балалы ғаиләләрҙә бер-ике генә гаджет булған осраҡтар хаҡында ла беләбеҙ. Һөҙөмтәлә “Кем беренсе булып уҡыясаҡ?” тигән һорау тыуа. Был проблемаларҙы бергәләп хәл итәсәкбеҙ. Бөтә балалар ҙа уҡый алһын өсөн башҡа төрлө алымдар эҙләйбеҙ.

Әле – апрель, тиҙҙән май айы етә. Бер минутты ла бушҡа әрәм итергә ярамай. Һеҙ уҡырға, төплө белем алырға һәм киләсәгегеҙҙе матур итеп ҡорорға тейешһегеҙ.

Мин һеҙгә ниндәй һабаҡтар бирергә теләйем? Беренсенән, барыһы ла үҙегеҙҙән тора. Һәм һеҙҙең киләсәгегеҙ ҙә. Һеҙҙең бурыс – уҡыу. Икенсенән, бөгөн – геройҙар заманы. Әле, кешеләрҙең иң яҡшы һәм иң насар яҡтары асыҡланған осорҙа, кемдер яҡындарына ярҙам итә, мохтаждарға аҡсаһы менән бүлешә, аҙыҡ-түлек алып бирә, ә кемдер битлектәр һатып байырға, ололарҙы алдап мутлашырға тырыша. Геройлыҡ – ул автомат тотоп яуға инеүҙә генә түгел, ә кеше булып ҡалыуҙа, яуаплылыҡ һаҡлауҙа сағыла. Йылдар үтер, һеҙ ошо ваҡыттарҙы иҫләйәсәкһегеҙ һәм шул саҡта үҙ ҡылыҡтарығыҙ өсөн оялырға яҙмаһын. Бөгөн һеҙҙән артыҡ күп нәмә лә талап ителмәй: үҙегеҙҙе һаҡлағыҙ, уҡығыҙ, үҫешегеҙ!” – тип мөрәжәғәт итте Радий Хәбиров ҡыҙҙар һәм малайҙарға.

Әлбиттә, төрлө уҡыу платформаларына теркәлеүҙә атай-әсәйҙәрҙең ярҙамынан башҡа мөмкин түгел ине. Интернет селтәренә көсөргәнеш тыуасағын белеп, төрлө ҡатмарлыҡтарға ла әҙер булыу талап ителде. Эйе, онлайн уҡыу еңел генә бирелмәй. Тәүге уҡыу көнө барыһын да һынаны. Атай-әсәйҙәрҙең, балаларҙың түҙемлеген дә. Белгестәр кәңәшен тотайыҡ: бөтәбеҙ ҙә бер хәлдә, балаларҙың уҡыуы ҡала тип борсолоуҙарҙы улар иңенә ауыр психологик йөк итеп һалмайыҡ, ата-әсәләр! Китаптар алдыбыҙҙа, уҡытыуыларыбыҙ һәр саҡ беҙҙең менән бәйләнештә. Мәғариф идаралығынан хәбәр итеүҙәренсә, тәүге көндәрҙә дистанцион уҡытыу буйынса асыҡланған етешһеҙлектәр өйрәнелә, саралар күрелә.