ҘУР ЮЛДАРҒА БЕҘҘЕ СЫҒАРҘЫҢ ҺИН

Һайран мәктәбе үҙенең 50 йыллыҡ юбилейын билдәләне.

Был күркәм байрам ветеран уҡытыусыларҙы, төрлө йылдарҙағы сығарылыш уҡыусыларын һәм байтаҡ ҡунаҡтарҙы бергә йыйҙы.

Һәр мәктәптең үҙ тарихы, тәрбиәләп үҫтергән билдәле шәхестәре бар. Был ауылда ла мәғариф эше үткән быуаттың 30-сы йылдарында ойошторола, мәктәп бинаһы булмау сәбәпле, тәүҙә дәрестәр ауыл мәсетендә алып барыла. Күпмелер ваҡыттан мәктәп ете йыллыҡҡа әүерелә. Ә 1967 йылда ул урта белем биреү усағы итеп үҙгәртелә һәм тиҙҙән яңы бина төҙөлә. Яңы мәктәп һалыуға ул ваҡыттағы директор Фәрит Хәбиров ҙур көс һала. Мәктәптең 50 йыллыҡ юбилей тантанаһына төрлө йылдарҙа етәкселек иткән директорҙары ла саҡырылғайны. Ишембай районы муниципаль районы хакимиәте эргәһендәге ҡатын-ҡыҙҙар советы рәйесе, Ишембай махсус белем биреү учреждениеһы директоры Гүзәл Шаһиева ла 2004-2010 йылдарҙа ошо белем усағын етәкләй. Тап шул осорҙа мәктәпкә ҙур реконструкция эшләнә. Үҙенең сығышында ул Һайран мәктәбенең һәр ваҡыт алдынғы булыуын, берҙәм коллектив тупланып балаларға төплө белем бирелеүен, был учреждениенан байтаҡ күренекле шәхестәр сығыуын билдәләне. Шул уҡ ваҡытта бөгөн йәштәрҙең күпләп ситкә сығып китеүе арҡаһында ауылда балалар һанының кәмеүенә лә борсолоуын белдерҙе.

- Ауыл үҫһен, йәштәр ҡайтһын, мәктәп ябылмаһын, - тигән теләктәр менән тамамланы ул үҙенең сығышын.

Әхмәтзәки Вәлиди исемендәге 2-се башҡорт гимназия-интернаты директоры, муниципаль район башҡорттары ҡоролтайының башҡарма комитеты рәйесе Әлфис Фәйзуллин да ҡасандыр Һайран мәктәбендә белем алған.

- Данлыҡлы уҡыусылар ул – һеҙҙең хеҙмәтегеҙ. Һеҙ бәләкәй генә балаларҙан шәхестәр тәрбиәләйһегеҙ, - тине ул уҡытыусыларҙың хеҙмәтен данлап.

Мәғариф хеҙмәте ветерандары Мәрйәм Иҫәнова менән Сабира Баймөхәмәтованың байрамда ҡатнашыуы сараның мәртәбәһен арттырҙы. 92 йәшлек ауылдың хөрмәтле ағинәйҙәренең һөйләгәндәре һуғыш, унан һуңғы йылдарға алып ҡайтты.

Мәрйәм Иҫәнова Һайранда 1943 йылда уҡыта башлай.

- Ул ваҡытта ағас мәктәп ине. Заманына күрә ярап ята ине. Һалҡындарҙа шәл бәйләп, кейенеп ултырып та уҡынылар.Сей утын, ул йүнләп янмай, шуға иртәнсәк һыуыҡ була торғайны. Шулай ҙа балалар белем алырға тырышты, дәрес ҡалдырманылар, - тип һөйләне ул.