Көслөләр көс һынашты

Сараны тантаналы асыуҙа Ишембай ҡала биләмәһе Советы рәйесе Салауат Солтанморатов, көрәш ветераны Нурулла Хисмәтуллин, Стәрлетамаҡ фзкультура, идаралыҡ һәм сервис колледжы директоры, РФ-ның атҡаҙанған физкультура хеҙмәткәре Миҙхәт Мусаҡаев, «Башҡортостан» гәзитенең баш мөхәрире Вәдүт Исхаҡов, турнир бағыусыһы Александр Васильев һәм башҡа абруйлы ҡунаҡтар ҡатнашты.

Көрәш буйынса урындар командалар араһында билдәләнде. Өсөнсө урынға Мәләүез ҡалаһы командаһы лайыҡ булды һәм 20 мең аҡса менән бүләкләнде. Икенсе урында – Ишембай командаһы, улар призға 25 мең һум алды. Беренсе урынды Өфө ҡалаһы командаһы яуланы, көрәшселәргә 35 мең һум тапшырылды.

Ишембай нефть колледжының икенсе курс студенты Данил Булатов өсөн был көндә икеләтә шатлыҡ булды. Беренсенән, ул финал ярышында Өфө егетен 5:0 мәрәй менән еңде, икенсенән, егет ГТО-ның алтын билдәһе менән баһаланды.

- Мин сығышым буйынса Дәүләкән районынан. Көрәш менән 5-се кластан шөғөлләнәм, Ишембай нефть колледжына уҡырға килгәс, районда был спорт төрөнөң ни тиклем үҫешкәнен күреп хайран ҡалдым. Тренерҙар ҙа көслө, үҙ эштәрендә уңышлы. Бында ла көрәш менән шөғөлләнеүемде дауам иттем, уҡып сығып эшкә урынлашҡас та ташламаҫмын, тип уйлайым, - тип ихлас уртаҡлашты Данил.

Автор фотоһы.