Еңеүҙәр көс кенә түгел, тырышлыҡ та талап итә

 

Башҡортостанда физик культура һәм күмәк кеше ҡатнашлығында спорттың үҫеше сәләмәт йәмғиәттең ойошоуы һам халыҡтың йәшәү сифатын арттырыу өсөн мөһим роль уйнай. Спорт инфраструктураһы, комплекстар, стадиондар һәм тренажер залдары төҙөлөшөнә айырым иғтибар бүленә. Республикала физик культура һәм спорт менән 2,175 миллиондан ашыу кеше (физик культура һәм спорт менән шөғөлләнеүгә тыйыуҙарҙы, сикләүҙәрҙе иҫәпкә алып) даими шөғөлләнә. Был халыҡтың 58,2 проценты тигән һүҙ.

Төбәктә йыл һайын 15,5 мең физкультура һәм күмәк кеше ҡатнашлығында спорт саралары ойошторола. Уларҙа 800 меңдән ашыу кеше ҡатнаша. Был – төрлө байрамдарға һәм билдәле даталарға бағышланған комплекслы спартакиадалар, фестивалдәр, универсиадалар һәм башҡа саралар. Мәҫәлән, спорт декадаһы, спорттың ҡышҡы төрҙәре көнө, Рәсәй саңғыһы, Олимпия көнө, Физкультурник көнө, Милләттәр кросы һәм башҡалар.

Әйткәндәй, 2022 йылдан Башҡортостан Республикаһы Башлығы Кубогына йәйге һәм ҡышҡы спорт төрҙәре буйынса Универсиада ғәмәлгә индерелде. Был сара 30 спорт төрө буйынса үткәрелә. Спорт форумында 2022-2023 уҡыу йылында өс меңдән ашыу кеше ҡатнашҡан.

 

Ишембай районында физик культура һәм спорт өлкәһендә биш спорт мәктәбе, “Батыр” физкультура-һауыҡтырыу комп-лексы, “Ишембай-Арена” боҙ һырғалағы, алты коммерциялы булмаған ойошма, 13 инструктор-методист эшләй. Туғыҙ ауыл Советында эшмәкәрлек алып барыла. Биш спорт мәктәбендә 2000-дән ашыу тәрбиәләнеүсе шөғөлләнә. 22 спорт төрө үҫеш алған.

Шул уҡ ваҡытта “Ауыл тренеры” дәүләт программаһы ла уңышлы эшләп килә. 2021-2023 йылдарҙа 20 Ишембай тренеры ошо проектта ҡатнашҡан һәм 600 меңдән бер миллионға тиклем аҡса алған. 2024 йылда был программала ҡатнашҡан шашка буйынса ике тренер-уҡытыусыға түләнелгән.

Ҙур ҡыҙыҡһыныу менән велоспорт мәктәбенә юлландыҡ, был көндә балалар күнекмәләр үтә ине. Беҙҙе ирле-ҡатынлы тренерҙар Надежда һәм Руслан Мөхәмәҙиевтар ҡаршы алды.

Тарихҡа күҙ һалғанда, 1-се спорт мәктәбенең велоспорт бүлегенә 1998 йылда нигеҙ һалынған. Бөгөнгө көндә унда 6-17 йәштәрҙәге 80 спортсы шөғөлләнә. Мәктәптә дүрт тренер-уҡытыусы эшләй. Улар менән танышып үтәйек: Руслан Мөхәмәҙиев – велоспорт буйынса Рәсәйҙең спорт мастерлығына кандидат, БР чемпионы, юғары категориялы тренер-уҡытыусыһы, Надежда Мөхәмәҙиева – Рәсәйҙең спорт мастеры, Рәсәй чемпионы, юғары категориялы тренер-уҡытыусыһы, Юлия Елепина – беренсе категория тренер-уҡытыусыһы, Елена Фәйзуллина – беренсе категория тренер-уҡытыусыһы.

 

Тап ошо спорт төрө Мөхәмәҙиевтар ғаиләһен тыуҙыра ла инде, улар күнекмәләрҙе бергә үткән була. Үҫкәс, ғашиҡ йәштәр сәстәрен-сәскә бәйләй. Руслан туғыҙ йәштән шөғөлләнһә, Надежда был спорт төрөнә 14 йәштән килә. Ғаилә башлығы күп тапҡырҙар БР Спорт мининистрлығының, муниципаль райондың рәхмәт хаттары, маҡтау ҡағыҙҙары менән бүләкләнгән. Уларға терәк булып өс йәшлек Артем һәм ете йәшлек Максим үҫеп килә. Максим да ата-әсәһенең юлын дауам итеп, ошо спорт төрө менән шөғөлләнә. Был өлкәлә ул ете йыллыҡ тәжрибә туплаған, Ишембай районы беренселеге призеры.

Велобаза Промысла урамы, 15-се йорт адресы буйынса урынлашҡан. Руслан Ришат улы беҙгә бина буйлап экскурсия күрһәтте. Мәктәп эсендә күнекмәләр өсөн бөтә кәрәк-яраҡ бар: дөйөм физик әҙерлек һәм махсус өсөн ике спорт залы, сисенеп-кейенеү, душ бүлмәләре, оҫтахана, кер йыуыу машинаһы. Күнекмәләр күберәк саф һауала үтә. Шулай уҡ балаларҙың 19-сы мәктәптә шөғөлләнеү мөмкинлеге бар. Тәрбиәләнеүселәр спорт мәк-тәбе беренселегенән алып Рәсәй беренселегенең ярыштарында ҡатнаша. Быйыл улар төрлө кимәлдәге 30 стартта ярышҡан.

Беҙ Бөтә Рәсәй ярыштары призеры Руслан Ғәзизов тураһында һораштыҡ, әле уның ҡайҙа булыуы тураһында ҡыҙыҡһындыҡ.

Веломәктәптә шөғөлләнгән спорт-сыларҙың береһе – Семен Соболев, 2-се мәктәптең 10-сы класс уҡыусыһы.

Ҡыҙҙарҙан Аделина Ҡаһарманова менән таныштыҡ. Ул да 2-се мәктәптә уҡый, 9-сы класҡа бара.

 

Автор фотолары.