Спорт – тормош рәүеше

Өфө районында үткән полиатлон буйынса ярыш һөҙөмтәләре буйынса муниципаль райондар араһында Башҡортостандың XXIX Ауыл спорт уйындары зачетында Ишембай районы йыйылмаһы 1-се урын алды. Ишембайҙар командаһы составында Лиана Әмирханова, Милена Носова, Рушан Хөснөтдинов, Илнур Ниғмәтуллин сығыш яһаны. Шәхси зачетта Рушан һәм Милена - икенсе урында.

Полиатлон буйынса (ҡышҡы өс төр ярыш) Рәсәйҙең спорт мастеры Илнур Ниғмәтуллин саңғыла шыуыу менән өс йәштән үк шөғөлләнә башлай. Спортсыны полиатлонға
ылыҡтырыуға атаһы тырышлыҡ һала. Ә.Вәлиди исемендәге 2-се башҡорт гимназияһы-интернатында уҡығанда ла, артабан Салауат педагогия колледжында һәм БДУ-ла белем алғанда ла, шулай уҡ әрме хеҙмәте барышында ла егет спортты ташламай. Әүҙем шөғөлләнеү, төрлө кимәлдәге ярыштарҙа призлы урындар яулап тороу - уның тормош рәүеше. Әле Илнур төҙөлөш өлкәһендә эшләп йөрөй.

- Был ярышта әллә ни үҙемде күрһәтә лә алманым шикелле, сөнки ауырығандан һуң нығынып китә алманым. Спортһыҙ үҙемде күҙ алдына килтерә алмайым, сөнки ул үҙе тормош, сәләмәтлек нигеҙе, - ти спортсы.