Бөтә яңылыҡтар
Спорт
19 Декабрь 2018, 02:00

Саңғы миҙгеле асылды

Үткән йәкшәмбе ҡаланың Саңғы базаһында саңғы миҙгеле асылды. 1-се Балалар һәм үҫмерҙәр спорт мәктәбенең 65 йыллығына арналған был сарала Ишембай районы һәм ҡалаһынан, Салауаттан, Стәрлетамаҡтан барлығы 200-гә яҡын кеше ҡатнашты, 17 яҡташыбыҙ призлы урындар яуланы.

Үткән йәкшәмбе ҡаланың Саңғы базаһында саңғы миҙгеле асылды. 1-се Балалар һәм үҫмерҙәр спорт мәктәбенең 65 йыллығына арналған был сарала Ишембай районы һәм ҡалаһынан, Салауаттан, Стәрлетамаҡтан барлығы 200-гә яҡын кеше ҡатнашты, 17 яҡташыбыҙ призлы урындар яуланы.


Саңғы базаһы иртә менән ҙур спорт байрамын хәтерләтте. Бәләкәс кенә саңғыларын тотоп кескәйҙәр ҙә килгән, ярышта ҡатнашырға дәрт иткән ололар ҙа аҙ түгел ине. Ишембай районы хакимиәтенең физик культура, спорт һәм туризм буйынса комитет рәйесе Альберт Сәғәҙиев, ҡатнашыусыларҙы тәбрикләп, быйыл саңғы миҙгеле асылыуға ярайһы ғына ҡар яуыуын да ыңғай күренеш итеп билдәләне, барыһына ярыштарҙа уңыштар теләне, спорт сараларында әүҙем ҡатнашырға өндәне. Спорт ветераны 84 йәшлек Рәшит ағай Исмәғилов тантанаға хөрмәтле ҡунаҡ итеп саҡырылғайны.


- Саңғы уҙышы - таралған спорт төрө. Ишембайҙа ул юғары кимәлгә ҡуйылған, яҡшы һөҙөмтәләргә өлгәшеүсе саңғысылар беҙҙә аҙ түгел. Спорт ветерандары ла был йәһәттән йәштәргә матур өлгө күрһәтә. Ғөмүмән, спортҡа һөйөүҙе балаларҙа бәләкәйҙән үҫтерергә кәрәк. Спорт кешене тәрбиәләй, коллективты берләштерә, - тигән фекерҙәрен әйтте ул.


Миҙгелде асыу тантанаһынан һуң сараның иң йәнле өлөшө - ярыштар башланды. Һәр кем үҙенең йәш категорияһында етеҙлеген һынаны. Балалары ярышҡанда ата-әсәләренең, олатай-өләсәйҙәренең кескәйҙәрҙе дәртләндереп, еңеүгә әйҙәп тороуы ла спорт байрамын биҙәне.


Иң бәләкәс саңғысыларҙың береһе 7 йәшлек Фәдис Вилданов та билдәләнгән араны ауырлыҡһыҙ үтте. “Саңғыла йөрөүе оҡшай, һәр ял һайын шыуырға киләм”, - ти ул.

Малайҙың әсәһе Зөлфиә Зиннәт ҡыҙы ла бик ҡәнәғәт:

- Улым саңғыға өс йәшлек сағында баҫҡайны, шул ваҡыттан алып саңғынан айырылмай. Күңел һалып йөрөгәс, уның ниәтен хуплайбыҙ. Хәҙер инде икенсегә саңғы комплекттары алдыҡ. Бөгөн дә, ярышта ҡатнашам тип, дәртләнеп килде. Ярыш майҙаны гөрләп торҙо. Балалар ғына түгел, өлкәндәр араһында ла ҡатнашыусылар байтаҡ йыйылды. “Ишембай электр селтәрҙәре” предприятиеһы исеменән ярыштарҙа сығыш яһаусы Ирина Плотникова менән һөйләшеп киттек.


- Хәҙер инде 20 йыллап саңғыла шыуам. Үҙем өсөн, үҙемдең һаулығым өсөн кәрәк ул миңә. Телевизор алдында йоҡомһорап ултырғансы, саф һауала йөрөп, күңел күтәренкелеге, рухи көс алып ҡайтам. Саңғыла ла рәхәтләнеп шыуам, бассейнға ла йөрөйөм, - тине ул.


Олоһон да, кесеһен дә бергә туплаған байрамдан ауылдыҡылар ҙа ситтә ҡалмаған.


Әхмәрҙән 1-се кластан алып ауыл йәштәренә тиклем ҡатнашыусылар бар ине. Әлеге ярышта өс бер туған Раушан, Руслан, Денис Вәлиевтарҙы күреп һоҡландыҡ. Бына бит сәләмәт тормошто үҙ иткән ниндәй матур быуын үҫеп килә!


- Кисә Салауатта саңғы миҙгелен асыу ярышында ҡатнашып ҡайттыҡ. Ауыл йәштәре исеменән сығыш яһап, Әминев Булат 1-се урын яуланы. Бөгөнгө ярышта ла көслө генә саңғысыларыбыҙ ҡатнаша, - тип һөйләне ҡаланың 1-се балалар һәм үҫмерҙәр спорт мәктәбенең Әхмәр мәктәбе ҡарамағындағы филиал тренеры Венер Әминев.


Был юлы һынатманы әхмәрҙәр, үҙәренең йәш категорияларында тос ҡына уңыштар яуланылар. Бер километрға уҙышта 9 йәшлек Раушан Вәлиев - 2-се, 11 йәшлек Алһыу Хәбирова - 3-сө, йәштәр араһында 5 километрға ярышып, Булат Әминев 2-се урын яуланы. Әхмәрҙәрҙең тренерҙары үҙе лә йәштәргә өлгө күрһәтте – спорт ветерандары араһында дүрт километр ара үтеп, 1-се урынға сыҡты.


Ярыш аҙағында һөҙөмтәләр билдәләнде. Беренселекте алыусылар рәтендә ишембайҙар ҙа, стәрлетамаҡтар ҙа, салауаттар ҙа булды. Шулай ҙа уларҙың барыһын да сәләмәт тормош яҡлы булыуҙары, ялды файҙалы итеп уҙғара белеүҙәре берләштерҙе. Тейешле араны “һә” тигәнсе шыуып үткән, йөҙҙәре алһыуланған, күҙҙәренән нур сәсеп торған саңғысыларға ҡарап тороп көнләшерлек тә ине. Әллә күпме ваҡытҡа етерлек күңел көрлөгө алып ҡайта бит улар. Саңғы миҙгеле саҡ башлана ғына. Ә алда күпме ярыштар көтә. Уларҙың береһе - Яңы Йыл саңғы уҙышы 30 декабрҙә үткәрелә! Тимәк, саңғыны үҙ иткәндәр йәнә стартҡа баҫа.




Фото: автор.

Читайте нас в