ЙӘШЛЕК ТАНТАНА ИТТЕ

Ялан буйлап рәткә теҙелгән палаткалар, һәр команданың хәүефһеҙлек, экология талаптарына ярашлы үҙ территорияһын ҡороуы, сағыу яҙыуҙар, йәйғор төҫтәрендәге флагтар, тәмле аш еҫтәре һәм, әлбиттә, йәштәрҙән бөрккән сәм, кәйеф – быларҙың барыһын барып күреп тойорға кәрәк. Юҡҡа ғына бер ҡатнашҡандар бында ҡат-ҡат килмәй, “35 йәшем тулды, аш бешереп торорға булһа ла барам”, тейеүсене күптәр аңлар.

Бында районыбыҙҙың иң әүҙем, дәртле, уҡыуҙа ла, спортта ла һынатмаған, һайлаған һөнәрендә лә уңған йәштәр йыйылған тип аңлайым. Ошо йылдар эсендә туристар фестивале көтөп алған сараға әйләнде. Иң мөһиме, бында берҙәмлек тыуа, - тине муниципаль район хакимиәте башлығы Марат Ғайсин фестивалдә ҡатнашыусыларға уңыштар теләп.

Райондың етенсе туристар фестивале флагын күтәреү былтырғы еңеүселәргә – Ишембай нефть колледжы командаһына ышанып тапшырылды. Әйтеүҙәре буйынса, быйыл да улар еңергә тип килгән. Бер уларҙа ғына түгел ине шул был теләк. Ҡатмарлы маршрутты үтеү, төнгө ориентир, КВН командаларына хас шаян, дәртле сәхнә сығыштары, туристарға тейешле оҫталыҡтарҙа һынау, бер-берең өсөн янып-көйөү, шатланыу – былар барыһы ла Турфест -2018 тарихына яҙылды. Беренсе урын башта уҡ үҙҙәрен көслө белдергән “Ишембай электр селтәрҙәре” командаһында – көнләшергә түгел, әҙерлектәрен баһалап, өйрәнергә ҡала. Икенсе урында – нефть колледжы йәштәре, ә инде лайыҡлы өсөнсө урынды Ишембай һөнәрселек колледжы командаһы эләктерҙе. Еңеүселәргә район хакимиәте тос бүләктәр әҙерләгәйне. Фестивалде ябыу тантанаһында әйтелгән теләктәрҙе лә йәштәр күңелдәренә һалып ҡуйҙы – уларға ышаналар, район һәм ҡала тормошонда әүҙем булыуҙарын көтәләр.