Йүгереп, һикереп кинәндек!

11 август - Физкультурник көнөндә Ишембайҙа төрлө спорт саралары ойошторолдо, уларҙа 560-ҡа яҡын кеше ҡатнашты.

Байрам программаһын генерал-майор Эмир Ниғәмәтйәнов иҫтәлегенә арналған еңел атлетика уҙышы-гандикап асты. Саңғы базаһында үткән ярышта Ишембай, Өфө, Салауат, Стәрлетамаҡ, Мәләүез,
Күмертау ҡалаларынан, Ергән ҡасабаһынан спортсылар ҡатнашты. Стартҡа баҫҡан иң йәш йүгереүселәр – Кәримә Абдуллина менән Алина Ғүмәроваға ете йәш тулһа, иң тәжрибәлеһе Рауил Миһрановҡа – 77 йәш. Ойоштороусылар уларҙы махсус приздар менән билдәләп үтте.

Һөҙөмтәләргә килгәндә, 11 километрға ярышта икенсе йыл рәттән ҡалабыҙҙың 1-се балалар-үҫмерҙәр спорт мәктәбе тәрбиәләнеүсеһе Дарья Кузнецова еңеүсе булды, Диана Иманғолова – өсөнсө, Наталья Гаврилова дүртенсе килде. Диана Сиражетдинова (8-се урын) менән Виктория Исхаҡова (9-сы урын) иң яҡшы унау иҫәбенә инде. Ир-егеттәр араһында яҡташтарыбыҙ Рушан Хөснөтдинов – алтынсы, Дмитрий Фролов 8-се урын алды. Бер километрға йүгергән малайҙар һәм ҡыҙҙар араһында беҙҙең район һәм ҡаланан 14 йәш еңел атлетыбыҙ – еңеүселәр һәм призерҙар рәтендә.

“Нефтсе” стадионында райондың физкультура-спорт йәмәғәтселегенең иң яҡшы вәкилдәрен һәм Ишембай спорты ветерандарын тәбрикләү тантанаһы үтте. Муниципаль район хакимиәте башлығы Марат Ғайсин һәм Башҡортостан Республикаһы Дәүләт Йыйылышы-Ҡоролтай депутаты Александр Работяев барыһын да һөнәри байрам менән ҡотланы.

Һуңынан ҡала һәм район хеҙмәтсәндәре Спартакиадаһына старт бирелде. Ғаилә йылына арналған ярыштарҙа предприятиеларҙан, учреждениеларҙан, ойошмаларҙан барлығы 26 команда (420 кеше) ҡатнашты.

Дөйөм команда зачетында ауыл биләмәләре араһында – Ишәй ауыл Советы, предприятиелар һәм учреждениеларҙан – Ишембай үҙәк район дауаханаһы, уҡыу йорттары араһында Өфө дәүләт авиация-техник университетының Ишембай филиалы еңеүсе булды. Ҡатын-ҡыҙ етәкселәр араһында Ҡолғона ауыл биләмәһе хакимиәте башлығы Наилә Вәлиева, ир-егеттәр араһында 6-сы торлаҡ-эксплуатация участкаһы директоры Рәсүл Исхаҡов еңеү яуланы.