Азаматтың азаматтары еңеү яулай

Бөгөн илен, ғаиләһен һаҡларҙай, көслө рухлы ир уҙаманын тәрбиәләү мөһим заман талабына әйләнде. Шуға ла хәстәрлекле атай-әсәй, балаһына ниндәй ҙә булһа файҙалы шөғөл табып, тәү сиратта, ихтыяр көсө, яуаплылыҡ, тәртип, үҙенә ышаныс тәрбиәләүҙе маҡсат итеп ҡуя.

2-се мәктәптең физкультура уҡытыусыһы Азамат Ғәлин 1999 йылда тап ошо маҡсат менән каратэ буйынса күнекмәләр үткәреү өсөн ике зал аса. Уларҙың береһе 17-се мәктәптә, икенсеһе Әхмәтзәки Вәлиди исемендәге 2-се башҡорт гимназия-интернатында урынлаша.

Тырыш эш һөҙөмтәһе бушҡа китмәй: 19 йыл эсендә Башҡортостан, Рәсәй Федерацияһы һәм Халыҡ-ара турнир чемпиондарын тәрбиәләй тренер. Каратэ-киокусинкай буйынса 40-тан ашыу ҡала беренселеге үткәрә.

Азамат Ғәлин - юғары категориялы уҡытыусы, икенсе категориялы тренер, беренсе категориялы судья һәм, әлбиттә, ҡара билбау эйәһе. Үҙенең тәрбиәләнеүселәре менән ҡалабыҙҙа һәм республикала үткән спорт сараларында әүҙем ҡатнаша, күрһәтмә сығыштары менән һоҡландыра. Уларҙың даны республикала ғына түгел, алыҫ тарафтарға ла таралған.

– Каратэның файҙаһы ҙур – балаларҙы йыйнаҡлыҡҡа, тәртипкә өйрәтә, үҙенә ышаныс тәрбиәләй. Иң мөһиме, бала бәләкәйҙән үк һаҡланыу сараларын белеп үҫә, - ти Азамат Ғәлин.

Әлбиттә, тренерға ла күп нәмә бәйле. Азамат Сибәғәт улы балаларҙы ярата һәм дәртләндерә, йөрәктәрендә еңеү уты ҡабыҙа белә. Каратэ менән шөғөлләнеүселәр араһында ҡыҙҙар ҙа күп. Рухлы, көслө кешене балалар ҙа ихтирам итә. «Каратэ-киокусинкай нимәһе менән балаларҙы ҡыҙыҡтыра?» – тип һорайым тренерҙан.

– Боронғо көнсығыш спорт төрөнөң, көрәш алымдарынан тыш, фәлсәфәүи яғы ла ҡыҙыҡтыра спортсыларҙы, – ти ул.

– Күнекмәләр башлар алдынан йәш көрәшселәр, кире уйҙарҙан арынып, таҙарына. Каратэ менән шөғөлләнгән кеше тәнен генә түгел, йәнен дә сыныҡтырырға өйрәнә.Тулы тыныслыҡҡа ирешеп кенә үҙеңде көрәшкә, яҡты маҡсатҡа, еңеүгә көйләй алаһың. Ҡытайҙарҙың тормош девизинда мосолмандарға хас боронғо тәрбиә алымдары ла төҫмөрләнә: кеселәргә һәм өлкәндәргә ихтирамлы булыу, күңелеңде ағыулаған, сәләмәтлегеңде ҡаҡшатҡан алама ғәҙәттәрҙән арыныу, аҡыл тупларға ынтылыу, юғары үрҙәргә күтәрелгәндә итәғәтле, изгелекле булыу. Иң мөһиме – йөрәк көсөңә ышаныу, бөтә яҡлап камиллыҡҡа ирешеү, – тип тә өҫтәне балаларҙың остазы.

Тимәк, Азаматтың азаматтарын алда тағы ла ҙур еңеүҙәр, бейек үрҙәр көтә.