Ауылдың ике яғын тоташтыра

Ҡанаҡай халҡы әллә ҡасан уҡ ауылдың ике яғын тоташтырып торған күперҙе ремонтларға хыяллана ине, бер нисә йыл элек улар Урындағы башланғҫыстарға ярҙам программаһында ла ҡатнашты.

Ниһайәт, бөгөнгө көндә, был төҙөкләндереү эше тормошҡа ашты. Күперҙе яңыртыуҙа «Едих Е.В.» крәҫтиән-фермер хужалығы етәксеһе Евгений Едих ҙур бағыусылыҡ ярҙамы күрһәтте. Әлбиттә, был сара республика «Атайсал» проекты сиктәрендә ғәмәлгә ашырылды.

- Евгений Викторович ауылдың ерҙәрен эшкәртеүгә алды, хеҙмәткәрҙәренә яҡшы эш хаҡы түләй. Халыҡҡа пай еренә – 2-3 центнер иген, 12-шәр рулон һалам бирә. Уның техникаһы ла яҡшы,егеттәргә эшләргә уңайлы.

- тип уртаҡлашып үтте Ҡанаҡай ауылы әүҙемселәренең береһе Райхана Кинйәбаева. – Уҙған йыл беҙ – ауыл халҡы, мәктәп уҡытыусылары һәм уҡыусылары исеменән Едихҡа бағыусылыҡ ярҙамы һорап хат яҙҙыҡ. Күпер авария хәлендә ине, ҡышын, аяҡ аҫты тайғаҡ булған саҡта, балалар өсөн хәүеф тыуа. Евгений Викторвич ярҙам күрһәтергә теләгәс, яҙын уҡ күперҙең һыҙмаһын эшләп бирҙек. Ремонт эштәре барышында Евгений Едих үҙ транспортын һәм эшселәрен ебәрҙе. Бөтә Ҡанаҡай халҡы уға ҙур рәхмәт белдерә.

- Мин күрше ауылда, Әхмәрҙә, тыуып үҫтем. Әлбиттә, ҡанаҡайҙарҙы, уларҙың тормошон яҡшы беләм, - тип үҙ фекерен белдерҙе Ишембай районы Башҡорттары Ҡоролтайы рәйесе Салауат Солтанморатов. – Бөгөн ошо ауыл кешеләренең һәм Евгений Едихтың «Атайсал» проектына ҡушылыуын күреү оло мәртәбә. Әхмәр, Ҡанаҡай һәм башҡа ауылдар килсәктә лә ошо йүнәлештә әүҙем эшләр, тигән ышаныста ҡалам.

Райхана КИНЙӘБАЕВА фотолары.