Ағалы-ҡустылы яугирҙарға миҙал

Улар хәрби бурысын үтәгәндә күрһәткән батырлыҡтары һәм ҡаһарманлыҡтары өсөн генерал Шайморатов миҙалына лайыҡ булды. Награданы республика Башлығы Радий Хәбиров аҙна һайын үткәрелгән оператив кәңәшмәлә тапшырҙы. Яугирҙар тыуған ауылына ҡыҫҡа ваҡытлы отпускыға ҡайтҡайны. Ағалыҡустылы бер туғандар бергә мобилизациялана, бер дивизионда хеҙмәт итә. Радий Хәбиров егеттәргә иҫән-һау өйҙәренә әйләнеп ҡайтыуҙарын теләне һәм республика уларға, ғаиләләренә ярҙам итәсәген билдәләне.

“Старший” ҡушаматлы яугир тормош иптәше менән ҡыҙ үҫтерә.

- Хеҙмәт юлы яҡшы үтә, миҙал алыу минең өсөн ҙур ғорурлыҡ, сикһеҙ рәхмәтлемен, - ти ул.

“Младшой” иһә әлегә өйләнмәгән, ул да үҙ теләктәрен еткерҙе.

- Ағайым менән бергә хеҙмәт итәбеҙ, берберебеҙгә һәр ваҡыт ярҙам ҡулы һуҙабыҙ. Махсус хәрби операция тамамланып, тиҙерәк тыуған яҡҡа ҡайтырға яҙһын, - ти яҡташыбыҙ.

Әйткәндәй, бер туғандар ял ваҡытында әсәләренә йорт һалырға ла булышлыҡ иткән. Егеттәр “УАЗик” машинаһын һатып алып, уны үҙҙәре менән махсус хәрби операция зонаһына алып киткән.