Еңеү көнөнә һикһән изге эш

Ишембайҙа акцияға 16-сы мәктәптең «Беҙ - еңеүселәрҙең тоҡомдары» командаһы ҡушылды. Унда уҡытыусылар, уҡыусылар һәм уларҙың атаәсәләре инде. Әүҙем уртаҡ эш тәүге һөҙөмтәләрен бирҙе лә инде. Мәктәптә Бөйөк Ватан һуғышына һәм Ленинград блокадаһын бөтөрөүгә арналған художестволы һәм биҙәүҡулланма эштәре күргәҙмәһе ойошторолдо. Һәләтле уҡыусылар картиналарҙа тарихи ваҡиғаларҙың фажиғәле мәлдәрен һүрәтләне һәм хатта үҙенсәлекле макеттарҙа хәрби көнкүреште реконструкцияланы.

«Еңеүгә 80 изге эш» проектының һәр этабы мәктәптең социаль селтәрҙәрендә сағылыш таба. Унда тематик класс сәғәттәре, Мамай ҡурғаны буйлап виртуаль экскурсияның нисек үтеүе тураһында мәғлүмәт, уҡыусыларҙың ата-бабалары тураһында һөйләүҙәрен табырға мөмкин. Мәҫәлән, туғыҙынсы класс уҡыусыһы Михаил Шумаков үҙенең өләсәһе Наталья Мурсаикова  тураһында хикәйә баҫтырып сығарҙы. Уҡыусының ғаиләһе тулҡынландырғыс хәтирәләрҙе телдән телгә тапшыра ине: “1941 йылдың 22 июнендә, иртән фашистик Германияның Тыуған илебеҙгә һөжүм итеүе тураһында хәбәр иткән Юрий Левитандың тауышы ишетелгәндә, миңә 16 йәш ине. Ҡурҡыныс һуғыш ваҡытын иҫкә төшөрөү ҡыҙғаныс! Ҡыҙыл Армияға күпләп мобилизация башлана. Өлкән ағайым Филипп һәм ике туған ағайҙарым да фронтҡа китте. 1921 йылда тыуған Николай ағайым Украинаның Ровненск өлкәһендә ғәмәлдәге хеҙмәттә ине. Петровск ауылында беренсе ерләү тураһында хәбәрҙе беҙ Николай ағайыбыҙға алдыҡ. Аҙаҡ башҡа ауылдаштарыбыҙға ла үлем хәбәрҙәре килә башланы. Өлкән ағайыбыҙ Филиптың вафат булыуы хаҡында хат 1941 йылдың авгусында килде. Апайымдың ире Владимир ҙа һәләк булды. Туғандарымдың береһе лә фронттан әйләнеп ҡайтманы. Әсәйебеҙ ҡайғынан, түккән күҙ йәштәренән күреү һәләтен юғалтты…”, – тип һөйләне Наталья Мурсаикова.

«Еңеүгә 80 изге эш» проектының үҙенсәлеге шунда: һәр яңы задание арҡаһында мәктәп уҡыусылары командаһы һуғыш йылдары тураһында тағы ла күберәк белә ала. Ун беренсе класс уҡыусыһы Елизавета Лагутина тылда йәшәү тураһында шул йылдарҙағы шаһиттан ишетә. Ҡыҙ Прасковья Гагарина менән әңгәмә ҡорған команда составына инә. 1941 йылда Прасковья Степановнаға ни бары ете йәш тула. Һуғыш балаһы мәктәп уҡыусыларына үҙенең ауыр бала сағы тураһында һөйләне, яҡындарын иҫкә төшөрҙө.

- Прасковья Степановна изгелекле, яҡты кеше булып сыҡты. Оло йәшенә һәм ауырлыҡтарына ҡарамаҫтан, ул барыһын да хәтерләй, киләсәк быуынға ҡалдырырға теләгән китабын яҙа, - тип тәьҫораттары менән уртаҡлашты Елизавета Лагутина. – Миңә бигерәк тә героинябыҙҙың хатта аслыҡ ваҡытында ла бик татыу йәшәгән ҙур ғаиләлә үҫеүе иҫтә ҡалды. Минең ғаиләлә лә һуғышта ҡатнашыусы булды - ул олатайым. Ҡыҙғанысҡа ҡаршы, ул фронтта хәбәрһеҙ юғалған, ә беҙҙә уның бер генә фотоһы һаҡланған. 

Был мәҡәлә баҫылып сығыр алдынан 16-сы мәктәптә ижади оҫталыҡ дәресе үткәрелеүе билдәле булды. Унда бишенсе класс уҡыусылары Еңеү көнөнә брошка-сувенирҙар эшләгән. Команданың тағы ла бер ҡатнашыусыһы - Дарья Гузняева - һуғыш ветерандары өсөн значоктарҙың эксклюзив дизайнын әҙерләгән. Үҙ эшендә ҡыҙ Ишембайҙың символын - Башҡортостан нефтен тәү башлап асыусыларға һәйкәл һәм Георгий таҫмаһын берләштерҙе. Билдәләрҙе 3D-принтерҙа баҫтырып сығарыу һәм дөйөм Еңеүгә үҙ өлөшөн индергәндәрҙең барыһына ла бүләк итеү күҙаллана.

Патриотик проект 30 апрелгә тиклем дауам итә. Һәм уҡыусылар командаһы алдында Рәсәй тарихындағы иң әһәмиәтле ваҡиғаларҙың береһенә арналған байтаҡ изге эштәр тора.